I-League: Pynkhreh ka Shillong Lajong ban ia aireng pyrshah ia ka Delhi FC lashai ka sngi 

Syllad | The Rising MeghalayaNovember 21, 2023

Ka Shillong Lajong FC ka bym pat shym la shah rem ha kane ka lympung ialehkai I-League, kala long kaba la pynkhreh ban ia aireng pyrshah ia ka Delhi FC ha ka jingialehkai ka ban long haka sngi Balang ha ka por 2 baje nohphai sngi ha madan SSA Stadium,Shillong.

Hadien ba ka la ioh ia ka jingjop kaba don burom pyrshah ia ka Gokulam Kerala FC ha ka jingialehkai kaba long dangshen, ka Lajong FC mynta ka la pynkhreh ban ia aireng pyrshah Delhi FC kaba la dep jop ha ki artylli ki jingialehkai bad kaba la iakhaid shisien bad shah rem shisien bad kaba la ioh ban khur 7 point na ki saw tylli ki jingialehkai.

Haba kren shas ki pathai khubor shwa ba kan leit sha katei ka jingiakhun u coach ka Delhi FC u Yan Law u la pynpaw ba ka kynhun jong u ka la long kaba la pynkhreh bha khnang ba kan ioh ia ka jingjop ha ka jingiakhun pyrshah ia ka kynhun trai jaka ka bym pat shym la shah rem shisien ruh, kata da kaba pyrto ruh ia ka rukom ialehkai bha ka Lajong kaba la ioh ia ka kabu ba pura lyngba ka jingkyrshan na ki paid nongshong shnong.

Ka Lajong FC ha kawei pat ka bynta, hadien ka jingjop ha ka jingialehkai dangshen bad laitylli ki jingiakhaid mynta ka la ioh 6 point na ki saw tylli ki jingialehkai bad wan hadien ia ka Delhi kaba la tam da 1 point.

Kumjuh na ka liang u head coach ka Shillong Lajong u Bah Bobby Nongbet haba kren sha ki lad pathai khubor u la pynpaw ia ka jingangnud dik dik na ka bynta kane ka jingialehkai ka ban long lashai ka sngi khamtam hadien ba ka kynhun ka la lah ban pynrem noh ia ka Gokulam FC. Hynrei, u la ong ba kin ym shim sting satia ha kane ka jingiakhun pyrshah ia ka Delhi FC hadien ka jingjop ka jong ki pyrshah ia ka Aizawl FC jngai na la ka jong ka jaka nalor ka jingdon ia ki katto katne ki player kiba kynsai hapoh ka kynhun jong ki.

Watla katta kane ka jingialehkai lashai ka sngi kan long kaba itynnad shibun namar baroh ki ar kynhun ki la wan lyngba ka jingjop ha ki jingialehkai kiba hashwa.