I-League: Lashai yn ia aireng ka Lajong pyrshah ia ka Rajasthan United ha Hyderabad 

Syllad | The Rising MeghalayaDecember 2, 2023

Hadien ka jingjop bad ka jingiakhaid kaba mar lai sien kynthih, ka Shillong Lajong FC mynta kan ia aireng pyrshah ia ka Rajasthan United ha ka round kaba 8 jong ka jingialehkai I-League ka ban long lashai ka sngi 3 tarik Nohprah ha ka madan ialehkai Deccan Arena hapoh Hyderabad ha ka por 4:30 janmiet.

Hadien ka jinglah ban ialehkai bha naduh kaba sdang ha kane ka samoi, kata lyngba ki san tylli ki jingialehkai ha la iing na ki hynriew tylli ki jingialehkai, mynta ka Lajong ka la ioh 12 point bad don ha ka kyrdan kaba 4.

Na ka liang u head coach ka Shillong Lajong, u Bah Bobby Nongbet haba kren sha ki lad pathai khubor shwa kane ka jingialehkai u la ong ba u khmih lynti ba kane ka jingialehkai ka ban long lashai ka sngi pyrshah ia ka Rajasthan United watla kan dei kaba jwat da kaba shim halor ka jingialeh kaba jngai na la iing, hynrei u kyrmen ba ka kynhun jong u kan iakhun tyngeh ban ioh sa kawei pat ka jingjop bad ban ioh khur ia ka lai point.

Kumta ruh na ka liang ka Rajasthan United hapoh ka jingialam jong u head coach u Pushpender Kundu mynta ka don ha ka kyrdan kaba 12 ha ka miej niew point, kata tang lyngba kawei ka jingjop, kawei ka jingiakhaid bad shah rem 5 sien bad ioh khur tang 4 point na ki hynniew tylli ki jingialehkai.

Mynta ka Lajong kan khmih lynti ban bteng ia ka jingiakhun khlem shah rem naduh kaba sdang bad ban ialehkai bha pyrshah ia ka Rajasthan United khnang ban ioh khur ia ka lai point bad ban nangkiew ha ka miej khein point.