I-League: Ha ka sien kaba nyngkong shah rem noh ka Shillong Lajong haka Aizawl FC

Syllad | The Rising MeghalayaDecember 10, 2023

Ka Aizawl FC ka la lah ban pynrem noh ia ka Shillong Lajong FC da 3-0 ha ka jingialehkai kaba la long haka 10 tarik Nohprah, ha Madan SSA Stadium, Polo, Shillong.

Kane ka dei ka sien shah rem kaba nyngkong jong ka Shillong Lajong naduh kaba sdang jong ka jingialehkai mynta ka aiom ialehkai, kata hadien khyndai tylli ki jingiakhun ha kaba ka la jop saw sien, iakhaid saw sien bad shah rem noh ha kane ka sien kaba mynta. 

Ka Aizawl ka la ialehkai bha mar ia sdang ka jingialehkai da ioh ban pynkhih jar tang ha ka minit kaba saw lyngba u rangialehkai shakhmat jong ka u Lalrinzuala Lalbiaknia. Hadien ka la bteng ban ban jan shakhmat da kaba ioh thep biang da shi kol ha ka minit kaba 17 lyngba u R Ramdinthara.

Da ka jingsngew skhem lyngba kine ki 2 kol kiba ka la ioh ban thep ha ka kylla step, kane ka la ailad ia ka Lajong ba kan lah ban pyrshang ban banbor ha ki minit kiba bud tad haduh kaba kut noh jong ka kylla step.

Haba bteng ia ka jingialehkai ha ka kylla miet ka Aizawl ka la lah ban jam shakhmat da kaba ioh ban thep sa 1 kol lyngba u Joe Zoherliana lyngba ka corner ha ka minit kaba 57.

Na ka liang ka Lajong ka la pyrshang ban iakhun tyngeh ha kaba ka la ioh ruh ban lad ban khyrwit sha kol kumba katto katne sien hynrei kam shym la lah ban pynurlong ia ka jingthmu tad haduh kaba kut jong ka jingialehkai bad pynlong ia ka Aizawl ba kan ioh ban khur ia ka lai point.

Namar kane ka jingshah rem, ka Lajong mynta ka la neh ha ka kyrdan kaba saw bad ioh 16 point na kitei ki khyndai tylli ki jingialehkai. Mynta ka Lajong ka la hap ban pynkhreh ia kawei pat ka jingiakhun sha jngai na la iing pyrshah ia ka Real Kashmir FC ha ka 16 tarik mynta u bnai ha Madan TRC Turf Ground, Srinasgar ha ka por 2 baje nohphai sngi.