Husiar kiba dih duma sahuh ha ki jaka paidbah; bteng ki pulit ban dain kuna

Syllad | The Rising MeghalayaJuly 23, 2025

Shibynta ban shim ia ki lad jingiada ia ka koit ka khiah jong ki paidbah bad ban pynduna ia ka jingpyndonkam ia u duma, ki pulit ka East Khasi Hills ki la pyntreikam ia ka Cigarettes and Other Tobacco Products Act (COTPA), 2003, kaba khang pyrshah ia ka jingdih duma ha ki jaka paidbah bad ia ki dukan kiba die beain ia u duma hajan ki skul bad college.

Ki pulit ka Cantonment Beat House bad ka Lumdiengjri Police Station kila shim ia ki sienjam kiba tyngeh da kaba dain kuna ia bun ngut ki briew kiba pynkhein ia ki kyndon ain da kaba dih duma ha ki jaka paidbah.

Lyngba u kyrwoh la pyntip ba tang ha kine ki lai bnai ba la dep ki pulit ka East Khasi Hills ki la ai 1178 tylli ki challan bad ioh ban lum haduh T.99,280 ka pisa kum ka kuna ia kiba dih duma ha ki jaka paidbah.

Ki bor pulit ki la pyntreikam ia kane ka sienjam ha man la ki Police Station, Outpost bad ki Beat House hapoh ka district.

Kane ka long shibynta jong ka National Tobacco Control Programme (NTCP) ba la pyntreikam da ka Tnad ka Koit ka Khiah ka Jylla hapoh jong ka National Health Mission (NHM), Meghalaya.

Kane ka jingialap kam dei satia tang halor ka jingdain kuna, hynrei ka dei ka jingthmu ban pynkylla ia ki jinglong jingman bad ban iada ia ki khunlung khynnah, ki tymmen bad ki bym dih duma na ka tdem duma jong ki briew kiba dih duma. Ka thong ka jong ngi ka long ban pyllait ia ka Meghalaya na u duma,” ong uwei u heh pulit da kaba bynrap ba kane ka sienjam ba la shim ka la ioh ka jingkyrshan kaba pura na ki paidbah.

Na ka liang i Dr. Nabneeta D. Mawrie, NTCP State Nodal Officer i la ong; “U Duma ula long ka daw jong haduh 40% jong baroh ki jait jingpang bampong (cancer) bad 90% na ka jingpang bampong ha ka shyntur. Ka jinglah ban rat dyngkhong ia u duma kan lah ban khanglad ia kiba bun bah ki mynsiem briew. Ngi pyrto ia ka sienjam ba la shim da ki pulit.”