Hukum tohkit u DC halor ka jingkhlad ka longkmie armet ha MCH Hospital, Jowai

Syllad | The Rising MeghalayaJune 6, 2025

U Deputy Commissioner ka West Jaintia Hills, u Abhinav Kumar Singh ha ka 5 tarik Jylliew u la pynmih ia ka hukum ban pynlong da ka jngtohkit ha kaba iadei bad ka jingkhlad jong kawei ka longkmie armet kaba kyrteng ka Pynche Bareh hapoh Maternal and Child Health Hospital ha Jowai.

“Na ka liang ki bor pyniaid District ki la thaw ia ka enquiry committee kaba kynthup ia ki sawngut ki dkhot ban pynlong ia ka jingtohkit halor kane ka jingjia kaba sngewsih khnang ban lap ia ki jingshisha baroh,” ong u DC ha ka jingpynmih hukum.

Ia kane ka committee yn khlieh da ka Additional Deputy Commissioner Kong B Blah. La bthah ia ka committee ba kan pyndep ia kane ka jingtohkit bad ban aiti ia ka kaiphod hapoh ka 9 tarik Jylliew.

Kane ka longkmie armet ka la khlad noh hapoh katei ka hospital ha ka 4 tarik Jylliew ha kaba ki la mih ruh ki jingkynnoh ba ka jingkhlad ka jong ka ka dei namar ka jingleh sting jong ki doktor bad ki nurse kiba sumar hapoh kane ka hospital.

Katkum ki kyndon treikam, la bthah ia ka committee ba kan bishar bniah ia ka jingbud ryntih jong katei ka jingjia bad ka rukom sumar ba la leh ha ka por ba pdiang bad sumar ia ka nongpang, ban pynshisha la ki la bud ne em ia ki rukom treikam ba la buh bad ki kyndon sumar, ban pynthikna lada don kano kano ka jingpynslem, ka jingbym shimkhia lane jingduna na ka liang jong ki nongtrei jong ka hospital, ban shim ia ki jingkren na ka liang ka hospital bad kiba haiing jong ka lanot bad kiwei pat ki kynhun bad ruh ban ai  jingmut na ka bynta ban pynbeit lada donkam kynthup ia ki lad ki lynti ki ban khanglad ia kiba kum kine ki jingjia ba kin wan jia biang hadien habud.

La bthah ia baroh ki heh kiba iadei bad kane ka kam kynthup ia u Superintendent MCH Hospital ba kin ai ka jingiatreilang kaba pura bad ka committee bad ban ai ia baroh ki jingthoh bad ki jingtip kiba kongsan katkum ka jingdonkam.

Na kaliang ka Kong Beautiful Bareh (Kaba dei shipara bad ka kmie ka longkmie kaba khlad Ka Pynche Bareh) kala mudui da ka jingujor ejahar pyrshah iaki doktor bad nos jong ka MCH hospital halor ka jingkynnoh lehtorti bad jingbym ai ka jingsumar kaba biang bad dei por iaka Kong Pynchei katba ka dang im ha kane ka sla pyrthei.

Ia kane ka FIR la ujor ha u Ophisar Incharge ka Jowai Police Station haka 5 tarik Jylliew.

Katkum ka FIR, ka Kong Beautiful Bareh kala kynnoh ba katei ka hospital ka don ïa ka histori jong ka jingbym shimkhia haka liang ka koit ka khiah, watla ka dei ka jaka sumar kaba la pynïaid da ka sorkar.

Shuh shuh ka Kong Bareh haka FIR kala kyntu iaki bor jong ka ain ban tohkit bniah halor ka jingbym lah jong ka hospital ban ai jingsumar haka por kaba biang, ka jingbym shimkhia ha ka liang ka koit ka khiah bad ka jingleh khlem akor jong ka hospital kaba ju jia man ka por khnang ban iada na ka jingduh ki mynsiem ba luilui.

Lah ban pynkynmaw ka Kong Pynchei Bareh 37 snem rta na ka shnong Jalaphet, East Jaintia Hills District, kala wan sha MCH Hospital haka 3 tarik Jylliew da ka jingthmu ban kha khun hynrei na ka daw jong ka jingjur ka jingphlei snam haka janmiet jong ka 4 tarik Jylliew kala khlad noh haka por 9.30 mynmiet ryngkat bad I khunlung hapoh kpoh.