Hukum set phatok ka Sorkar ia ki 5 ngut ki snar nongkhaii drok ba la shah kem bunsien

Syllad | The Rising MeghalayaAugust 21, 2025

U Myntri ka Tnad Social Welfare u Bah Paul Lyngdoh ha ka 20 tarik Nailar u pyntip ba ka sorkar Jylla ka la ai ka jingmynjur ban set phatok haduh shi snem hapoh ka Prevention of Illicit Trafficking in Narcotic Drugs & Psychotropic Substances Act (PITNDPS) 1988 pyrshah Ia  ia ki 5 ngut ki snar nongkhaii drok kiba bun na ki, kiba la shah kem bunsien.

Ia kane ka hukum set phatok la mynjur da ka Advisory Board ki lai ngut ki dkhot ba la khlieh da u Retired Chief Justice hapoh ka kyndon 31 jong ka PITNDPS.

Kine ki san ngut ki snar nongkhaii drok ki dei kiba la tip kyrteng kum u Pynhoi Nongtdu ba ju khot sin u Pun (35), West Jaintia Hills ha ka 22 tarik Nailar 2024, Hubert Lamphrang Paliar ba ju khot sin Lungrit (22) na Mawiong Pyndengrei, Nongstoin West Khasi Hills ha u bnai Kyllalyngkot 2025, Marwil Nangbah ba ju khot sin Marwil (49) na Lumpariat, Jowai West Jaintia Hills, Rintu G Saika ba ju khot sin Pratap (35) na Nongrim Hills bad ka Aisha Khatoon alias Pahari (50 snem rta) na Lower Paltan Bazar.

“Nga sngewkmen ban pyntip sha phi ba naduh u bnai Nailar 2024 haduh mynta ngi la lah ban aijingmynjur ia ka hukum set phatok pyrshah ia ki san ngut ki snar nongkhaii drok kiba bun na ki kiba la shah kem bunsien. Ia kine ki case la phah sha ka Advisory Board ki laingut ki dkhot ba la khlieh da u Retired Chief Justice, bad halor ka jingmynjur jong ka Board la pynngat ia ki ha ka kyndon 31 jong ka Prevention of Illicit Trafficking in Narcotic Drugs & Psychotropic Substances Act (PITNDPS) 1988,” ong u Bah Paul haba kren sha ki lad pathai khubor.

U Myntri u la ong ba ka sorkar Jylla ka la shim ia ki sienjam kiba khlain ban thwet bad tehlakam ia ka iaid ka ieng jong ki nongkhaii drok hapoh ka jylla.

U la ong ba ki don shibun ki case kiba la ioh ban kem, kynthup ka jingioh kurup ia u drok ba shongdor haduh T.4 klur na East Jaintia Hills kaba dei ruh kawei na ki jingioh kurup drok kaba heh tam kat haduh mynta.

Ban pynshlur shuh shuh ia ki dkhot ka Anti-Narcotics Task Force (ANTF), u Myntri da lade hi un sa aiti ia ka song pisa bad ki syrnogt sha kito ki dkhot ba shlur kiba buddien bad kem ia kiba donkti ha ka jingialang ka ban long ha Directorate jong ka ANTF, Golflink ha ka 21 tarik Nailar.