Hukum set phatok ka kashari 23 snem ia u Passti Latam ba leh beijot ia ka khynnah

Syllad | The Rising MeghalayaAugust 23, 2025

Ka kashari jong ka P. Syngkon, Special Judge (POCSO), West Jaintia Hills District, Jowai ha ka 20 tarik Nailar ka la rai pynrem ia u Passti Latam 20 snem rta da kaba set phatok 23 snem namar ka jingdonkti ha kaba leh beijot ia kawei ka khynnah ha ka jingjia kaba la jia ha u snem 2021.

U Superintendent of Police ka District lyngba u kyrwoh u pyntip ba kane ka jingjia ka dei kaba mih na jingmudui ejahar ha ka 14.04.2021 da kawei ka longkmie ba ha ka 12.03.2021, une u briew uba la shah kynnoh donkti u Passti Latam lem bad uwei pat ki la rung jubor hapoh ka iingsah jong ka ha ka por ba kam shym la don ha iing bad ki la beh noh ia ki khynnah rit kiba don hapoh iing, katba ka khun jong ka kaba dang 16 snem rta ka la shah leh beijot ha u Passti Latam.

Ia kane ka case la register hapoh Jowai Police Station katkum ka section 447 IPC bad ka POCSO Act bad la tohkit bad charge sheet da ka WPSI N.P.S. Marak.

Hadien ba la dep ka jingtian bishar ka kashari ka la rai pynrem ia u Passti Latam hapoh ka kyndon 5(g) bad 6 of POCSO Act bad 448 IPC da kaba set phatok 23 snem ha ryngkat ka kuna T.51,000.