Hukum ka iingkashari ia ka Sorkar ban ym pynduh ia ki lad jingmyntoi sha ki briew bym don Aadhaar

Syllad | The Rising MeghalayaJuly 22, 2025

Ka iingkashari Meghalaya High Court ha ka 21 tarik Natiung ka la pynmih ia ka hukum ba shipor kaba bthah ia ka Sorkar jylla ba ka jingbym don Aadhaar number ne card kam dei satia ban long ka jingkhanglad na ka bynta ki jingioh jingmyntoi.

Ka la ong ruh na ka bynta kito ki bym don Aadhaar dei ban pdiang ia kiwei pat kot ki sla kum ki lad jingpynshisha khnang ba kin ym duh noh ia ki jingmyntoi kiba dei hok jong ki.

Kane ka hukum ka la mih haba bishar ia ka Public Interest Litigation (PIL) ba la mudui da u nongtrei mon sngewbha u Greneth M Sangma uba la tynjuh pyrshah ia ka jingpynbna ba la pynmih da ka sorkar jylla ha ka 31 tarik Risaw 2023 kaba bthah ia ki khynnah kiba kwah ban ioh jingmyntoi ban ioh biang ia ka pisa bai lut (Fees Compensation) na ka bynta ka Post Matric Scholarship jong ki samla pule ST/SC (Free Studentship) (ka skhim) lane ka jingiarap pisa sha ki samla ST/SC ka jylla ki bym ioh ia kano kano ka scholarship ba ki dei ban don ia u Aadhaar identification number.

Ia kane ka jingpynbna la pynshong nongrim halor ki artylli ki hukum jong ka Iingkashari Supreme Court ha ka mukotduma KS Puttaswamy (Retired) pyrshah ia ka Union of India & ors ha u snem 2015 bad kawei pat ha u snem 2019.

Ka Iingkahari ka shim ba ka Aadhaar Act kam shym la pynduh ia ka hok jong kino kino ki briew ba kin ioh ia ki jingmyntoi lada kim don ia u Aadhaar number.

Ka la kdew ruh ba ka kyndon 7 jong ka Aadhaar Act ka ai ruh ia kiwei pat ki lad ki lynti ban pynithuh ia ki briew ki bym pat don ia u Aadhaar number.

Namar kata, ha kaba iadei bad ka jingpynbna kaba 31 tarik Risaw 2023, katkum ka hukum ba shipor ngi bthah ia ka sorkar jylla ba ka don ia ka hok ba pura ban pan ia u Aadhaar number ne Aadhaar card na ki briew ban kloi ka jingpynithuh. Hynrei lada don ki briew ki bym lah ban ai ne ki bym don Aadhaar card ne number lane ki bym kwah ban leh Aadhaar, kumta une u briew un hap ban pynshisha kum u nongshong shnong haba phai sha kane ka Act lyngba kiwei pat ki kot ki sla ba la ithuh kum ka pan card, vote card, passport bad kiwei kiwei kiba lah ban pynhun ia ki bor sorkar ka jylla,” ong ka Division Bench u Chief Justice IP Mukerji bad Justice W Diengdoh ha ka hukum.

“Kumta ruh, ka jingbym don ia u Aadhaar number ne card kan ym dei satia ka jingshah pynduh,” ka la ong.

Ia kane ka PIL yn sa buh ha ka thup ban shong bishar biang ha ka 12 tarik Nailar 2025, kata hadien ba ka Iingkashari ka la shong pyrkhat bha ia kane ka kam, kynthup ia ka Aadhaar Act, Rules, ki hukum jong ka Iingkashari Supreme Court bad kiwei.