Hukum ka High Court wow kyrriah kreh noh ya u SP ka EJH heiyatoh wa i kaam mooyong

Syllad | The Rising MeghalayaDecember 19, 2023

Ka yung kasari wa khlieh dooh ka jylla, ka High Court of Meghalaya, Shillong haka 19 tarik Kmaichonglad hapoh i bichaar u Chief Justice (Acting) u HS Thangkhiew wa u Justice W. Diengdoh da chong bichaar ko ya ka mukotduma heiyatoh wa i tih mooyong tooh hapoh ka jylla katkam ka bui wa chem ka Committee wa samen u Justice (Rtd) B.P. Katakey.

Ka kasari da chim ko ya ka rai wa u Superintendent of Police ka East Jaiñtia Hills uwa da ksoh ya ini i kyrdan nadooh u 2021 toh u tip u yeiwa jia hapoh ka District wei nei tlot bor yong oo kam u khlieh ki pulit da em ki kaam wa man pyrchah ya ka aiñ heiyatoh wa i tih mooyong tooh.

Kamtæ ka kasari da rai ko chisiendon wow kyrriah kreh noh ya oo wei wow thung da uwi u sahep wa pnah hei kaam wow pait ya kani ka District wei da hukum leh ya ka chnat Home Department wa u Director General of Police u chimkhia ki wow leh yeiwa emkaam.

Kam wow kdaw heini, ini waroh da mih i hadien wa chem ka Committee u BP Katakey ha ka 11 tarik uni u bnai ya u mooyong wa suba wa dang dep tih wei da pynlang hadien ka Don Bosco College, Byndihati.

Da pynrap leh wa katkam wa ong u Deputy Commissioner ka District wa u mooyong hadien kani ka thaw puræ ye u wow man uwa da em ha ka yukheiñ wei ye leh wow man wa u mooyong ye uwa man wa da khlæh wa u mooyong wa dang dep tih wot.