Hikai ka SURE ïaki nongshong shnong ka Mukhap Mynso ban shna sboh

Syllad | The Rising MeghalayaJanuary 22, 2019

JOWAI: Ka Society for Urban and Rural Empowerment (SURE), Jowai ryngkat ka jingïatreilang bad ka North East Slow Food & Agro Biodiversity Society (NESAF) ka la pynlong ïaka ai jinghikai ban shna sboh haka shnong Mukhap, West Jaiñtia Hills District.

Kane ka jingai jinghikai ba shisngi la pynlong haka 21 tarik une u bnai kaba la wan ïashimbynta da ki nongshong shnong bad ki SHG’s na Mukhap bad Mynso. Ka jingai jinghikai kadei na ka bynta ban shna sboh na ki phlang ki rnem, ki jhur ki jhep bad nalor ki jingthung kiba pyut tang hapoh 18 sngi bala tip kum ka ‘Berkeley Composting’, kaba ïarap ban ïoh ïaka khyndew bad ka jingbam kiba khuid ba suba.

Ha kane ka jingai jinghikai la don naduh ka dkhot ka SURE ka Daka Bareh, Kong Pasqualina Lamare kaba la ai ïaka jingbatai ïaki Local Group bad Self Help Group (SHG’s) shaphang ka jingtreikam jong ka SURE.

Ka Kong Rika Lamare, Agricultural Development Officer (ADO) kala batai ïaka jingshna sboh ‘Berkeley Composting’.