Hiar wad bniah ka kynhun CCRI iaka jinghap u Sohniamtra haka shnong Narwan

Syllad | The Rising MeghalayaOctober 8, 2024

Ka ophis jong ka District Horticulture Officer, East Jaintia Hills District ha ryngkat ka jingiatreilang bad ka Quinquennial Review Team (QRT) jong ka Central Citrus Research Institute (CCRI) ha ka 7 tarik u Risaw ki la pynlong ka jingleit jurip ia ki jaka rep Sohniamtra jong ka shnong Narwan, East Jaintia Hills ban wad ia ka daw halor ka jinghap jong ki soh khlem dei por kaba la buh jingeh shibun ia ki nongrep.

Kane ka kynhun na ka QRT ka kynthup ia u Vice-Chancellor of Horticulture and Forestry University, Nauni, Solan, Dr. (Prof.) R.S Chandel, Former Assistant Director General (Horticulture Science), ICAR, New Delhi, Dr W.S. Dhillon, Former Director, ICAR-NRC on Pomegranate, Solapur, Dr R.K Pal, Former Dean and Director of Research, BCKV, West Bengal, Dr S.K Mitra, Former ADG (Plant Pathology) and Former Member ASRB, ICAR, New Delhi, Dr P.K Chakraborty, Ex-Head, Soil Science, ICAR-IIHR, Bengaluru, Dr A.N Ganeshmurthy bad ki scientists kynthup ia u Dr. A.K Das and Dr. D.M .Kadam, ICAR-CCRI, Nagpur, Dr H. Rymbai, ICAR-RCNEH, Umiam and Dr. E.S Marboh, ICAR-CCRI, RRCC, Biswanath Chariali, Assam.

Ha kane ka jingleit jurip la don lang ruh u District Horticulture Officer, East Jaintia Hills District, Bah DB Dhar, Assistant Director of Horticulture, East Jaintia Hills District, SR Mulieh and Horticulture Development Officers, Kong B Rymbai and Bah N Shylla, nongialam shnong bad nongrep ka thain Narwan.  

Ha ka jingkren ka liang u District Horticulture Officer, EJH, u Bah DB Dhar u la pynpaw ka jingsngewnguh ia baroh ki dkhot jong ka QRT ka CCRI da kaba pyntip ruh sha ki halor ka jingsngewkhia ha kaba iadei bad ka jingkynrei ka jinghap hi jong ki soh kum u Sohniamtra Khasi jong ka shnong Narwan bad u la pynpaw ruh halor ka jingthmu jong kane ka jingwan jurip ba la pynlong ha kane ka sngi.

Na ka liang u Bah Dhar u la pyntip ruh sha ki dkhot ka QRT ba ki nongrep jong ka soh niamtra jong ka shnong Narwan ki la khmih lynti ia ka jingai jingmut lem jong ki dkhot ka QRT ban weng ia kane ka jingeh kaba iadei bad ka jinghap soh kaba ki la sakhi ha kane ka kynti kaba mynta.

Na kaliang u Dr RS Chandel uba la ioh ban iamir jingmut bad ki nongrep Sohniamtra ka shnong Narwan u la ong ba ka QRT ka kut jingmut ban pynlong ka jingwad bniah halor kane ka daw jong ka jinghap jong ki soh da kaba kdew ruh halor ki lad ki lynti ha kaba ki nongrep ki lah ban pyrshang ban pynmih ia ki soh kiba bha, bad u la pynlut ruh katto katne ka por ban pynshlur ia ki nongrep ban thung ia ki jingthung jingtep nalor ka jingwanrah ia ki jingthung da kaba pynpaw ruh ba ka jingbym iahap ha ka jingioh ia ki jingdonkam kiba tei ka dei kawei na ki daw bah kaba la pynlong ia ki soh ba kin hap.