Hiar u Myntri sha Sohra ba jah ki shi kurim na Indore; da ki K9 bad drone pyndonkam ki pulit

Syllad | The Rising MeghalayaMay 28, 2025

U Myntri sorkar Jylla u Bah AL Hek haka sngi Balang u la hiar sha Sohra ban bishar ia ka kam kaba iadei bad ka jingwad ia ki shi kurim ki nongwan shangkai pyrthei kiba dei na Indore, Madhya Pradesh, kata ka Sonam bad u Raja Raghuvanshi kiba la jah rngai ha ka thain Sohra naduh ka taiew ba la dep.

“Ka jingwad ia kine ki shi kurim ka dang iai bteng ha kaba ki la don lai kynhun aijingiarap ba la kyrshan lang da ki K9 unit, ki drone na ka NESAC bad ki pulit Special Operations Team (SOT), kiba la iashim bynta ha kane ka jingwad ia kine ki shi kurim sha ka thain Nongriat-Pyndemdkhar-Mawlakhiat Mawsahew-Wahkaliar Weisawdong,” ong u Bah Hek haba kren sha ki lad pathai khubor.

Kine ki shi kurim la iathuh ba ki la wan poi ha ka shnong Mawlakhiat (Elaka Mynteng) ha ka 22 tarik Jymmang da kawei ka scooty kaba shu wai ban leit jngoh ia ka jingkieng diengjri ba la tip kum ka ‘Double Decker Root Bridge’ ha Nongriat ha ryngkat u nongialam lynti u Bah Bha Wansai ha kaba ki la sah ha ka Homestay ha Nongriat ha katei ka miet.

Ha ka jingwad la lap ia ka scooty kaba ki shim wai na Sohra Rim kaba don ryngkat u shabi ha ka 24 tarik. Na ka liang ki bor pulit ki la ioh pdiang ia ka jingujor na kiba haiing hasem jong kine ki shi jur kiba la pyntip ba kim ioh shuh ban phone ia ki namar ka phone jong ki ka la lip naduh ka miet sngi U Blei ba la lah.

Ki bor pulit ha ka jingtohkit ki la shem ba ha ka 22 tarik Jymmang kine ki shijur ki la iehnoh ia ki tiar jong ki ha Manha Homestay ha Saitsohpen, Sohra namar ka jingbym lait jaka sah bad namar ka jingjur slap da kaba ai ia ka kyrteng bad u nombor phone jong ki hashwa ba kin iaid shakhmat ban leit wad jaka sah. Hynrei hadien la ioh jingtip ba ki la bteng ia ka jingleit sha Nongriat.

Kane ka jingwad ia kine ki shi kurim kan bteng sha ki jaka riat ha ka thain Mawkdok, Umdiengpoh bad shaduh Sohra Rim bad ha lynter ka surok na Shillong sha Sohra.

Na ka liang u Myntri u la pynpaw ia ka jingdonkam ban shimkhia bad ban pynsted ia ka jingwad ryngkat ka jingkyrshan kaba pura na ka liang ka sorkar khnang ban lapdien pat ia kiba ki shijur.