Hiar pynsangeh ka KSU ïaka jingkhlong maw beaiñ ha Malidor

Syllad | The Rising MeghalayaDecember 30, 2020

Ka Khasi Students’ Union (KSU) Narpuh Circle haka sngi Balang kala hiar kyrkieh sha Malidor hadien ba kala ïoh jingtip na ki trai shnong ba ki nong Assam da ki phew ngut ki la wan khlong maw beaiñ biang na ka wah Malidor kaba dang hap hapoh u pud u sam ka jylla Meghalaya.

Ha kane ka jinghiar ka KSU sha Malidor la ïalam da u Bah KS Suchiang President, Bah S. Bamon General Secretary bad kiwei kiwei bad kila lap ruh da ki phew ngut ki khar Assam ki khlong maw beaiñ na katei ka wah bad ki la thep ha ki kali jong ki. Ka KSU mardor ka la phah pynhap ia ki maw kiba la kit hapoh trok bad beh krad iaki bad maham ba kim bit shuh ban wan khlong maw na katei ka wah kaba hap shapoh u pud u sam ka jylla Meghalaya.

Ha ka 8 tarik u bnai September (Nailur), kala beh iaki nong Assam kiba wan khlong maw na katei ka juh ka jaka bad la ai jingthoh bad iakynduh ruh ia u DC barim, hynrei kine ki nong Assam ki leh bymsuidniew bad bteng ban khlong maw na katei ka jaka.

Ka KSU kala kynnoh ruh ba kane ka jingjur ka jingkhlong maw ha katei ka jaka kadei na ka jingtlot treikam ka tnat forest kaba don ha Umkiang, Apha Range kaba dei peit ia kine ki jaka. Ha kajuh ka por ka KSU kala ong ba kan sa iakynduh biang ia u DC ban ai ka jingiada ia kane ka wah bad ban khang iaka jingkhlong maw beain ha katei ka jaka.

Shuwa ban leit sha Malidor kala buh syntiew ia u motdur u Woh Kiang Nangbah ha Khliehriat ban kynmaw burom iaka lyngkhuh sngi iap ba 158 snem u khlawait ka ri Jaintia.