Hiar jurip u Myntri Tourism ia ka Kupli Orchid Resort shibynta ban kyntiew ia ki kam jngohkai

Syllad | The Rising MeghalayaJuly 17, 2025

U Myntri ka Tnad Tourism u Bah Paul Lyngdoh ha ka 12 tarik Naitung u la leit jurip ia ka Kupli Orchid Resort ha ka shnong Priang, West Jaintia Hills, shibynta ka jingjurip ban kyntiew ia ki jingtei kiba iadei bad ki kam jngohkai ba pyniaid da ka sorkar.

Ha kane ka sngi la synran lang ia u Myntri da u MLA ka thain u Bah Nujorki Sungoh bad ka Director ka Tnad Tourism Director Ka Kong Brenda L. Pakyntein nalor ki ophisar jong ka Tnad.

Ha kane ka jingleit jurip u Myntri u la shong ruh da ka lieng ha kane ka resort ban bishar bniah halor ki sienjam kiba lah ban kyntiew ia ki kam jngohkai hapoh ka wah Kupli da kaba iamir jingmut ruh ba ki nongshong shnong.

Ha ka jingialang kaba la long hapoh resort, ka kynhun na ka Synjuk Ki Waheh Shnong Iooski-Saphai Circle ka la aiti ia ka dorkhas kaba kyntu ia ka sorkar ba kan kyntiew ia ka kam jngohkai ha ki 13 tyli ki shnong kiba don hapoh Chutwakhu–Saphai corridor bad kyntu ia ka jingtukar lem ba mardor na ka bynta kane kine ki kam pynroi.

Nalor kata ki la tyrwa ban pynbna ia kine ki shnong kum ki jaka tourism zone. KI la kyntu ruh ia ka sorkar ba ka dei ban shna map na ka bynta ban pynrung ia kine ki shnong hapoh ka jingkhmih jong ka Tnad khnang ba ki nongshong shnong kin ioh lad ha kaba iadei bad ki skhim sorkar, ki jingkyrshan pisa bad ki prokram aijinghikai.

Kumjuh ka Synjuk ka khot ruh ban shim ia ki sienjam ban pynkhuid bad pynim biang ia ka wah Kupli khnang ban kyntiew ia ki kam jngohkai bad ban pynneh pynsah ia ka mariang bad ki sawdong sawkun.

Shuh shuh ki la tyrwa ruh ban kyntiew ia ka water sports bad kiwei kiwei ki bynta kiba iadei bad ki kam jngohkai ha shilynter jong kane ka wah.