Hiar jurip u Dr Mukul ia ka Chokpot CHC halor ki jingeh ki jaka sumar bad ki nongkyndong

Syllad | The Rising MeghalayaMay 29, 2025

U Nongialam ka Liang Pyrshah uba dei ruh u Myntri Rangbah barim ka jylla u Dr Mukul Sangma u la pynlong ka jingleit jurip ia ka Community Health Centre (CHC) ha Chokpot, South Garo Hills shibynta ka jingpyrshang kaba dang iaid shakhmat ban sngewthuh ia ki jingshisha bad bishar bniah ia ki jingeh kiba ki jaka aijingsumar bad ki paidbah ha ki thain nongkyndong ki iakynduh.

U Dr Mukul u la ioh ruh ban iakren bad ki doktor, ki nurse bad ki staff jong ka CHC bad pyrto ia ka jingaiti bad ka jingtrei shitom ka jong ki ban pynbiang ia ka jingshakri ha ka liang ka koit ka khiah hapdeng kiba bun ki jingeh.

U la pynshlur ruh ia ka kynhun ki doktor ban pynlong man la ka por ia ki jingialang jong ka Hospital Management Committee (HMC) khnang ban pynthikna ia ka jingiatreilang kaba kham bha bad ban weng ia ki jingeh ha ki jingtreikam bad ban lah ban kyntiew ia ka jingshakri.

Ha kane ka jingleit jurip u Dr Mukul u la shimkhia ruh halor kiba bun ki jingeh ba la iasam da ki nongtrei bad ki nongshong shnong bad pynthikna ia ka jingkyrshan bad ka jingiatreilang ba pura jong u ban shim ia ki lad ki lynti ban pynbeit ia kine ki jingeh.

U la banjur ruh sa shisien halor ka jingdonkam ia ka jingphaikhmat bad ka jingshimkhia jong ka sorkar khamtam sha ki thain kiba duna ka jingshakri kum ha Chokpot.

Nalor kata u la pynpaw ruh ia ka jingsngewkmen halor ki jingpynpaw da ki nongtrei ka koit ka khiah bad u la ai ruh ia ka jingkitbok kitrwiang ia ka kynhun baroh kawei halor ka jingpyrshang kaba iai bteng ka jong ki ban ai ka jingshakri na ka bynta ka imlang ka sahlang.