Hiar jurip ka Nirmala Sitharaman ia ka shnong Laitkynsew, iakynduh ia ki SHG, FPO

Ka Myntri Pla tyngka ka Sorkar Pdeng ka Nirmala Sitharaman haka sngi Saitjain ka la hiar leit jurip ia ka shnong Laitkynsew, East Khasi Hills bad ioh ruh ban iakren bad ki Self Help Group (SHG), ki Lakhpati Didi bad ki Farmer Producer Organization (FPO).
Ha kane ka jingleit jurip ka la pynpaw ka jingsngew burom ia ka jingaiti lut jong ka Sorkar Meghalaya ha kaban pyntreikam ia ki skhim ka Sorkar Pdeng bad Jylla ha kylleng ka jylla. Ka la ban jur ruh ia ka jingkongsan jong ka roi ka par kaba kynthup lang ia baroh bad ka jingpynkupbor ia ki nongshong shnong ban kynjoh ia ka thong “Sabka Saath, Sabka Vikas.”

Ha kane ka jingleit jurip la ia don lang ruh ka Myntri ka Tnad ka rep ka riang ka Kong Ampareen Lyngdoh.
Haba ai khublei ia ka Sorkar Jylla halor ka jingpdiang burom, ka Myntri ka la ong ba kan mih na kane ka Jylla ha ryngkat ki jingkynmaw kiba khlain halor ka jingpyrshang ban rah ia ki skhim jong ka Sorkar India bad Sorkar Meghalaya sha ki kyndong kynshrot jong kane ka jylla kaba itynnad.

Haba kdew halor ka jingleit jurip jong ka hapoh ka aspirational district ka Ri-Bhoi bad ka jingiashim bynta ha ki jngialang bapher bapher ha Shillong, ka Myntri ka la pynpaw kumno ka jingiaid lynti jng ka Meghalaya ha ka roi ka par ka phalang sha ka thong jong u Myntri Rangbahduh ka Ri u Narendra Modi halor ka Viksit Bharat (Developed India) hapoh u 2047.
“Lada ngi ngeit shisha ha ka Sabka Vikas, ka roi ka par ka dei ban poi sha baroh – shynrang bad kynthei, ki shnong bad ki sor, samla bad tymmen, riewspah bad duk kumjuh,” ong ka Myntri, da kaba bynrap ba ka jingroi kaba kynthup lang ka dei ban ai bor ia uwei pa uwei u nongshong shnong ban bud ia ki jingangnud jong ki bad ban pynthikna ia ka jingim kaba don burom.
Nalor kata ka Nirmala ka la iaroh ruh ia ka jingkiew ha ka liang ka jingshakri ha ka koit ka khiah, khamtam ka jinghiar jong ka jingiap ki longkmie ba kha khun ha Meghalaya kaba pyni ia ka dak ka jingkylla kaba khraw ha ka jylla.
Nalor kata ka la ban jur ia ka bynta jong ki SHG na ka bynta ban wanrah ia kane ka jingkylla.Naduh u snem 2014, shibun ki sienjam la wanrah ban kyrshan ia ki kynhun jong ki kynthei da kaba nangpynsuk ban ioh shim ram, jinghikai, bad pynioh jingkyrshan bad ki jingpyniasoh ia ki iew nalor kiwei pat.Ka la iaroh ia ka jingmyntoi jong ki prokram Lakhpati Didi kiba thmu ban pynthikna ba kumba san ngut ki kynthei ha man la ki shnong ki dei ban ioh ia ka jingkamai ka ban kot T.1 lak shi snem.
Ka Myntri Pla tyngka ka la iai ban ruh halor ka jingmut jingmut jong ka Sorkar Pdeng ban kyrshan ia ka Meghalaya ha ka jingangnud ban tei ia ka ioh ka kot ka ban kynjoh sha ka 30 billion hapoh u 2030, ka thong kaba iasoh bad ka jingkdew lynti jong ka roi ka par jong ka ri India.
“Ban kynjoh sha kane ka thong, man la ki shnong ki dei ban noh synniang.Lada ka Meghalaya kan kynjoh sha kane ka thong, kan long kum ka nuksa bad nonglam lynti halor ka thong jong ka ri ban long ka ri kaba laroi hapoh jong u 2047,” ka la pynpaw.
Ha ka jingiakren bad kane ka Myntri, ka nuksa kaba khraw bha halor ka jingpynkupbor ia kynthei ha ki shnong ki thaw ka la wan lyngba ka Kong Lahun Mary Blah na ka Ieng Rasong SHG kaba la iathuh kumno ba ka la sdang tang da ka ram kaba T.4000 ban die jain bad pyniar ia kane ka kam jong ka.Katba ki sngi ki snem ki nangiaid ka la nangioh ia ka ram kaba kham heh kynthup ia ka ram kaba T.10,000 ban sdang ia ka dukan jain bad ka T. 1lak ka ram Community Investment Fund (CIF) na ka CLF 2025, kaba la plielad ia ka ban plie ia ka dukan sha bad ka dukan syntiew.
Ka la ong ruh ba kane ka jingsengkam kam shym la kyntiew tang ia ka ioh ka kot jong ka, hynrei ka la plielad ruh ha ka ai kam aijam ia kiwei pat. Ka jingkamai jong jong ka, ka la kiew na ka T.20,000 sha ka T.3.4 lak shi snem nalor ka jingkynshew ba shimet kaba palat T.4,080 ha ka SHG jong ka.
Leave a Reply