Hiar jurip ka Meghalaya Estimate Committee ia ka Residential School ha Sabahmuswang

Syllad | The Rising MeghalayaSeptember 6, 2023

Ka Meghalaya Estimate Committee mynta ka sngi Balang ka la hiar shapoh West Jaintia Hills ban leit jurip ia ka ka Residential school kaba don ha ka shnong Sabahmuswang, WJHD.

Ka Committee hapoh ka jingialam jong u Chairman uba dei ruh u MLA ka Nongpoh u Bah Mayralborn Syiem ha ryngkat ka jingsynran lang da u MLA ka Mawkyrwat u Bah Renikton L Tongkhar, u MLA ka North Shillong u Bah Adelbert Nongrum, MLA ka Jowai u Wailadmiki Shylla, MLA ka Selsella u Arbinstone B Marak bad ka MLA ka Ampati ka Miani D Shira ki la leit ban jurip ia kane ka residential school ban bishar bniah halor ka jinglong jingman bad ka rukom long ka jingtei jong kane ka jaka pule.

Na ka liang ki dkhot ki la ailad ruh ia u Rangbah Shnong ka Sabahmuswang bad ia ki trai kiba noh synniang ia ka jaka na ka bynta ban tei ia kane ka residential school ba kin pynpaw ia ki jingeh ki jong ki bad halor kino kino ki mat kiba iadei bad kane ka skul bad halor ka jingtreikam jong ka.

Hadien kane ia kine ki dkhot la leh burom ha ka jingialang kaba la long hapoh ka community hall ha Sabahmuswang.

Shuh shuh ha kane ka jingialang la ia don lang ruh Deputy Commissioner, West Jaintia Hills u Bah B.S Sohliya, IAS, District School Education Officer, Jowai Kong A P Syiem bad ki heh na ka tnat PWD (Building).