Hiar ialap elekshon u Myntri Rangbah sha East Jaiñtia Hills

Syllad | The Rising MeghalayaFebruary 16, 2019

JOWAI: U Conrad K Sangma, National President jong ka National People’s Party (NPP) bad u Myntri Rangbah jong ka Jylla Meghalaya ula hiar sha East Jaiñtia Hills District haka sngi Saitjaiñ ban ïalap elekshon MDC ka ban long ha u Rymphang 27 bad pan ka jingkyrshan jong u paidbah ban pynjop ïaka NPP ha JHADC.

U Conrad ula hiar nyngkong ha Khliehriat bad hadien ula leit sha ka shnong Sutnga. La synranlang ïa u da u Myntri ka Sorkar ka Jylla ba dei peit ïaka tnad C&RD bad Transport u Ma Sniawbhalang Dhar, u State President NPP Dr. WR Kharlukhi, u NPP West Jaiñtia Hills District President u Ma Octomewot Lamin haka jingiadonlang ki MLA barim ka thaiñ bad kiwei kiwei.

Ka East Jaiñtia ka don 9 tylli ki MDC Constituency jong ka Jaiñtia Hills Autonomous District Council.

Ha baroh kine ki constituency ka NPP kala pynieng kyrtong ba kynthup ïa kawei ka longkmie ka Kong Violet Lyngdoh, ka MDC ka Rymbai Khliehriat.

Kiwei kiwei ki kyrtong na ka Sutnga Narwan u MDC barim u Ma Seiborlang Shadap, Sutnga Nongkhlieh u Ma Silbinus Sukhlain, Sumer- u Ma Rolling Son Dkhar, Saipung u Ma Lalminga Ngamlai, Narpuh u Ma Mongol Sing Tyngkra, Bataw Lakadong u Ma Joinriwel Pyrtuh, Musniang Rangad Phasmon Dkhar, Tuber u Kerbhame Dkhar. Baroh kine ki kyrtong MDC ki ïadonlang.

U Conrad Sangma ula ong ka sorkar MDA hapoh ka jingialam jong u kala pyrshang tyngeh ban ïakren bad ka sorkar pdeng halor ka jingkhang tih dewiong bad ka kam shallan dewiong bad la leh katkum ka jiingdonkam bad ki kyndon ha kaba iadei bad ka kam tih dewiong.

Ula ïathuh halor ka trei shitom ka sorkar jylla hapoh ka jingialam jong u ban ïakynduh ïaki seng sain hima sima bapher ban pynbor ïaki ban pyrshah ïaka CAB hapoh ka Rajya Sabha. “Ka jingitylli bad ka jingmih ki paidbah ki kynhun sengbhalang bapher bapher, ka jingthmu ban pynlong aiñ iaka CAB kala pulom”, ong u Conrad bad bynrap ba lada ka CAB ka long aiñ kan ktah iaka thaiñ shatei lammihngi baroh kawei.