Hapoh ka 24-48 kynta phah pyndep u CM ka Jylla ia ki lad jingiarap sha ki lanot ‘eriong

Syllad | The Rising MeghalayaApril 1, 2024

U Myntri Rangbah ka Jylla u Conrad K Sangma haka sngi Nyngkong u la ong ba ka sorkar ka la bthah ia ki Deputy Commissioner jong ki District bapher bapher ba kin pyndep ia baroh ki lad aijingiarap sha ki lanot ‘eriong hapoh jong ka 24 haduh 48 kynta.

Haba kren sha ki lad pathai khubor, u Sangma u pyntip ruh ba na ka liang u Chief Secretary ka Jylla hynne ka sngi u la dep ban pynlong ia ka jingialang bishar kam halor kane ka jinglong jingman baroh.

Na ka liang u CM u la ong ba baroh ki Deputy Commissioner ki la ioh ia ka jingbthah ban shim ia ki sienjam ba donkam na ka bynta ban pynioh mardor ia ki lad jingiarap sha ki lanot kiba la shah ktah na ka jingwan lynshop kynsan jong ka ‘eriong kaba la jia ha kane ka sngi U Blei ba la lah ha ki bynta bapher bapher jong ka Jylla.

Nalor kata u Sangma u pyntip ruh ba na ka liang ka sorkar ka la dep lypa ban mynjur ia ka polisi treikam bathymmai ha u snem ba la dep ha kaba la pynkup bor ia ki Deputy Commissioner ba kin pyntreikam ia ki song jingiarap haba jia kino kino ki jingjia shah lynshop ha ki bor ka mariang.

“Mynta na ka liang ki DC kim donkam shuh ban wan sha nongbah Shillong na ka bynta ban ioh ia kano kano ka jingbit, hynrei ki la lah ban shim hi ia ka rai kaba laitluid ha kaba iadei bad ka jingpyllait ia ki lad jingiarap ba donkam kyrkieh sha ki lanot, kata la ka long ha kaba iadei bad ki jingdonkam ba kongsan kum ki marbam, ki tiar ki tar shna iing shna sem kum ki tnum iing bad kiwei kiwei,” ong shuh shuh u CM ka Jylla.