Hapdeng ka jingiphuh iphieng kut noh ka Behdienkhlam Chyrmang

Syllad | The Rising MeghalayaMay 2, 2025

Ka Behdienkhlam jong ka Seinraij Kongwasan Chyrmang kala poi noh sha kaba kut haka 1 tarik Jymmang. Kane ka Behdienkhlam ka dei kaba pynlong nyngkong eh hapoh rilum bad kaba pher na kiwei Behdienkhlam namar bala pyndep shuwa ban bet ia u symbai sha ki hali ki pynthor.

La wan ban sakhi da u MLA ka thaiñ Ma Lakhmen Rymbui, Dolloi ka Elaka Jowai Ma Puramon Kynjing, nalor kiwei kiwei ki nongialam na ki Seinraij bapher bapher haka jingialang kaba la pyniaid da u president ka Seinraij Kongwasan Chyrmang Ma Ker Lakiang.

U Langdoh Kongwasan Chyrmang u pyndep ia baroh ki jingleh niam bad ka suit ka shor haduh ka sngi ban pynkut iaka Behdienkhlam.

Ki rukom ka lehniam ne kñia ainguh kiba la pyndep da ki shakri niam ka Raid ki long Than blai, Thoh Langdoh knia Ryngkaw, Hat Khrong, ka Kamcharoh blai, Choh Thyndai, Boh Synrum.

Katba haka 1 tarik Jymmang ki rukom lehniam la pyndep ki long ka Choh Thyndai, Seh Bhang ha Khloo blai ryngkat ka nguh ka dem ka suit ka shor, ka jingshad ha Ïung Langdoh, ka jingpynkhein ‘Khnong blai’, ka jingpynhiar iaki ‘Charoh blai’ sha Aitnar.

Ki rot baroh ki long 7 tylli ba la wanrah da ki dong ba kynthup ka Bangla, Iapmuid, Chyrmang wah, Chyrmang nein, Wah biar–B, Lumbuh ja, bad Iongnohiap-lashait, hapdeng ka jingkynud ki sur jong ka bom ka bhuri bad la pynphuh pynphieng bad pynshongshit iaka shad Behdienkhlam da ka jingïashim bynta lang ruh ki khun samla kynthei haka riam ka beit ba bun rukom.

Hadien ka jingbret iaki rot la pyndep ruh iaka lehniam Iadaw Charoh.