Hapdeng ka jingiphuh iphieng kut noh ka Behdeinkhlam ka Seinraij Mukhla

Syllad | The Rising MeghalayaAugust 18, 2023

Ka lehniam Behdeinkhlam ba shisien shisnem ka Seinraij Mukhla kaba dei ruh ka Behdeinkhlam kaba khatduh jong u snem ha ka Rilum Jaintia ka la kut noh mynta ka sngi Thohdieng hapdeng ka jingiphuh iphieng bad shongkun.

Ha kane ka jingleh niam la wan sakhi ruh da u Symbud Myntri Rangbah ka Jylla u Sniawbhalang Dhar ha ryngkat ka jingdonlang u MLA ka Jowai u Wailadmiki Shylla, u Doloi Jowai u Puramon Kynjing, ki nongialam Sein Raij na Jowai, Tuber bad na kiwei kiwei.

Haba aijingkren u Ma Sniawbhalang Dhar ula ai ka jingkitbok kitrwiang ia ki khun ka Seinraij Mukhla ba kin ioh ia ka met kaba koit ba khiah, ka rep ka riang bad ka kamai kajih kaba dap ba biang.

Lah ban kdew ba ka Seinraij Mukhla man la u snem ka la pynlong ia kane ka lehniam ha ki saw sngi bad mynta u snem ka la sdang naduh ka 15 tarik une u bnai. Ha kane ka lehniam ka la don ki jinglehniam bad jingknia bapher bapher kiba kynthup ia ka leit pom dieng Blai (Khnong) lai tylli, ia kine ki dieng Blai la wanrah sha madan Tih Khyndaw.

Mynta ka sngi ka la don ka kynting khnong Blai bad ka knia Khlam Ram Shyllang kaba la leh ha duwan knia kaba don hajan ka Law Kyntang ka shnong Mukhla, bad ka la don ruh ka knia Ryngkaw bad ka Tyngkhain Khnong bad ia kine ki khnong la wanrah sha Biar bud pat sa ka jingwanrah ia ki rot sha ka Biar.

Katba ha ka nohphai sngi u Langdoh, u Sangot, ki maji, u chutia bad ki riew rangbah ki la iakynduh ha madan Slot Masi bad la wanrah ruh shi jaka ia ki Lai tylli ki rot ba la wanrah da ka Umlangchor, Neiñchnong bad Wahchnong ban pynhiar sha Aitnar.

Hashwa ban pynhiar ia ki rot, la pynhiar shwa ia ki 3 tylli ki Deiñkhlam ba la pynieng hynnin ka sngi ha madan Tihkhyndaw bad hadien ba la pynhiar lut ia ki deinkhlam la pynhiar sa ia ki Lai tylli ki rong ryngkat ka bom ka bhuri bad ka shad ka kmen.

Shuh shuh mynta u snem la don haduh 11 tylli ki rot kiba la wanrah sha ka Biar ryngkat ka shad ka kmen ka risa ka kynhoi bad hadien bala dep ban pynshad ia ki rot la bret pat ia ki kum ka dak ka jingpynkut ia ka lehniam Behdeinkhlam.