Hap leit phai thylli ki nongrep khlem ioh symbai ha ophis Horticulture ha Laskein

Syllad | The Rising MeghalayaMay 9, 2025

Ki nongrep naki shnong bapher bapher ba hapoh ka Laskein Block kila hap ban leit phai iing thylli namar bym ioh symbai naka ophis jong ka District Horticulture Officer kaba don ha Laskein, West Jaintia Hills District.

Katkum ka kyrwoh ba la phah da ka seng HNYM, la ong ba ki briew na kane ka ophis kila ai daki slip number sha ki nongrep bad la bthah iaki ban wan haka 7 tarik Jymmang naka bynta ban shim symbai, hynrei haba ki nongrep kila poi ha katei ka ophis ym don wat tang uwei ruh u nongtrei haduh ka 12.00 baje mynsngi.

Ki nongrep kila pyrshang ban phone sha ki nongtrei katei ka ophis hynrei ym don ba jubab iaki wat haba kila pyrshang bunsien bad kham hadien pat kila ioh jingtip ba khlem ai symbai ha katei ka sngi.

Ki nongrep ki pynpaw ka jingbitar halor ka jingleh jong ki nongtrei katei ka ophis namar bym long kumba ki la bthah iaki.

Ka HNYM West Jaintia Hills kala kyntu iaki nongtrei katei ka tnad ba ym dei ban leh kumne nangne shakhmat namar ka ktah iaki nongrep iaka por bad iaka bai kali jong ki nongrep khamtam kiba wan na ki shnong kiba jngai.