Halor ka jingmudui ka HNLC, yn shim bishar biang ka UAPA tribunal ha ka 9 tarik Iaiong

Syllad | The Rising MeghalayaMarch 23, 2025

Ka Unlawful Activities Prevention Act (UAPA) Tribunal ka la buh sngi ha ka 9 tarik u Iaiong ban wan ban shong bishar biang ia ka mukotduma ba la mudui da ka seng Hynniewtrep National Liberation Council (HNLC) kaba la aireng pyrshah ia ka rai jong ka Sorkar Pdeng ban pynjlan ia ka jingkhein beain pyrshah ia ka seng na ka bynta 5 snem.

U nongiasaid ain ka HNLC u Bah Fernando Shangpliang haba pyntip ia kane hakhmat ka Tribunal u la ong ba ka jingshim bishar halor kane ka phang kan long biang ha ka 9 tarik u Iaiong ha Guwahati, Assam.

“Ha ka jingshim bishar hynne ka sngi 22 tarik Lber nga la pyrshang ban aiti ia ka showcause ka jong nga, hynrei katkum ki kyndon ain, ka Tribunal kan ym shah namar ba la buh ia ka por ha ka 13 tarik Rymphang 2025 ban aiti ia ka jubab ne jingpyrshah ha kaba iadei bad ka jingpynjlan ia ka jingkhein beain, bad ba ka Sorkar Pdeng bad ka Sorkar Jylla ki la dep ban aiti ia ki affidavit jong ki,” u la ong.

“Ngi hap ban iaid shakhmat.Kumta ruh ha ka taiew ka ban wan na ka liang ka Sorkar India bad ka Sorkar Jylla kin sa aiti sha nga ia ki kot ki sla kiba iadei bad ki jingpynshisha ka jong ki ryngkat bad ki affidavit bad halor kane ha ka 9 tarik Iaiong ngan sa khmih bniah bha ia kiba la aiti da ka Sorkar Pdeng bad Sorkar Jylla,” bynrap u Bah Shangpliang.