Halor ka ejahar ia u DGP: Pynpaw u CM ban bteng ka jingtohkit wat hadien ba la shongthait

Syllad | The Rising MeghalayaMay 16, 2024

U Myntri Rangbah ka Jylla u Conrad K Sangma u la ong ba ka jingtohkit halor ka jingujor ejahar pyrshah ia u DGP ka Jylla u LR Bishnoi halor ka jingkynnoh pyndonkam thok ia u nombor plate na ka bynta ka kali jong u kan iaid shakhmat wat hadien ba u la shongthait na ka kam.

Haba kren sha ki lad pathai khubor ha ka 15 tarik Jymmang, u CM u la ong, “Ngi la pynpaw shai naduh kaba sdang ba ka ain kan leh ia la ka jong ka kamram, bad ka ain ka long kumjuh ia baroh, kumta ka ain kan pyndep ia la ka jong ka kamram.”

“Haba ka wan ka jingujor ejahar bad ban rejistar, kumta ka case kan iaid shakhmat bad ka jingtohkit kan iai bteng.Ka jingshongthait kan ym ktah satia halor kane ka bynta,” ong u Conrad.

“Kumba Nga ong ba ia ngi ka dei kaba suk haba wan ka jingujor ejahar kine hi ki dei ki case bad katkum ka ain kaei kaba donkam ban leh katkum ka ain khlem da khein la ki dei mano mano ruh,” ula ong.

Lah ban kdew ba ha ka 9 tarik mynta u bnai, u Assistant Inspector General (AIG) ka Tnat Pulit ka Jylla, u Bah GK Iangrai u la ujor da ka ejahar pyrshah ia u DGP halor ka jingkynnoh ba u la pyndonkam thok ia u nombor plate na ka bynta ka kali jong u.

Nalor kata kane ka jingujor ejahar hapoh Sadar Police Station kala wan long ruh tang khyndiat sngi shwa ba une u DGP  un shongthait noh ka kam kata ha ka 19 tarik Jymmang.

Shuh shuh haba kylli, u CM u la ong, “Em, kaba nyngkong hi ka long ngam ong ba ka dei kaba iahap ne em, ngam tip ia kata bad ngam kwah ban kynthoh ei ei halor kaei kaba u DGP u ong, ka don ka jingiadei ha ki kam shimet, Ngam kwah ban kynthoh ei ei halor kata.”