Haka sien kaba nyngkong shah jied laingut ki ‘mountain bikers’ ka jylla kynthup ia ka kynthei ba nyngkong sha ka “Asian Continental Championship”

Syllad | The Rising MeghalayaSeptember 9, 2023

Laingut ki ‘mountain bikers’ ne ki nongniah cycle ha ki jaka ba khohruh khohram na ka jylla kaba kynthup ia ka samla kynthei ka jylla ka ban mihkhmat nyngkong eh ia ka India ki la shah jied na ka kynhun Downhill Team jong ka ri ban leit iashim bynta ha ka “Asian Continental Championships,” ka ban long ha Kerala.

Kine ki laingut  ki kynthup ia u Apshai Griffith Niangti u Meban Aiboklang Suiam bad ka  Anissa Dariti Lamare kaba dei ka kynthei kaba nyngkong eh ka ban ioh ban leit mihkhmat ia ka India ha kaba kum kane ka jingiakop niah cycle.

Ia kane ka jingiakop yn pynlong ha Kerala bad Trivandrum naduh ka 26 haduh ka 29 tarik u Risaw 2023.

Ka Anissa Lamare lyngba une u kyrwoh ka  pyntip ba na ka liang ka Cycling Federation of India kan pynlong ia ka Training Camp na ka bynta kine ki nongiashim bynta kiba la shah jied naduh ka 9 haduh ka 30 tarik mynta u bnai. Kine ki nongiashim bynta kin hap ban sah ha Kerala naduh katei ka tarik tad haduh kaba kut jong katei ka Asian Continental Championship.

Kane ka dei ruh ka sien kaba nyngkong ba ki nongiakop niah cycle ne mountain bikes na ka jylla ba kin shah jied ban leit iashim bynta ban mihkhmat ia ka India.

Nalor kata u Kevin John Khyllait u nongiashim bynta ha ka jingiakop cross country ruh un shah hikai ha kane ka juh ka camp hashwa ba kan don sa kawei pat ka jingjied na ka bynta kane kawei pat ka tournament ia kaba yn sa pynbna khatduh na ka bynta ka kynhun XC Indian Team