Haduh T.100 klur pynlut ka Sorkar ban thung tynrai dieng ha kine ki 5 snem

Syllad | The Rising MeghalayaAugust 29, 2024

U Myntri Rangbah ka Jylla u Conrad K Sangma haka 29 tarik Nailar u pyntip ba ka Sorkar Jylla ka la pynlut haduh kumba T.100 klur ha kaba iadei bad ka jingthung ia ki tynrai dieng ha kine ki san snem kiba la dep.

Haba jubab hapoh ka iingdorbar thaw ain, u CM u la ong ba kane ka jingthung ia ki tynrai dieng la pynlong ha ki jaka kiba la kot baroh sha kumba 1.19 lak hectare.

Nalor kata u la pyntip ba ki don haduh kumba 99,78,352 tylli ki tynrai dieng ia kiba la thung hapoh ka Jylla naduh u snem 2020 tad haduh u bnai Jylliew mynta u snem. U la ong ruh ba ki tynrai dieng kiba im ki la kot sha ka palat 73,76,735 tynrai.

Halor ka jingkylli ba la wanrah da u MLA ka VPP na Mawryngkneng u Bah Heavingstone Kharpran, na ka liang u Conrad u la ong ba 75% kam dei satia kaba sniew ba ki tynrai dieng kin im, hynrei ka long ka jingshisha ba na ka liang ka Sorkar ka angnud ban pynthikna ba ki tynrai dieng kin im lut baroh ne 100 %.

“Ngi la shim ia baroh ki sienjam haba ngi thung ia kine ki tynrai dieng, ngi la wanrah lang ia ki nongshong shnong ba kin ia don bynta kaba la lah ban kyntiew ia ka jingim jong ki tynrai dieng,” u la ong da kaba bynrap ba na ka liang ka Sorkar ka la pynkhreh ia ki lad jingiarap sha kiba kum kine ki shnong khnang ban nanglah ban pynbun shuh shuh ia ka jingim jong ki tynrai dieng bad ka ban kot sha ka 100%.

Katkum ka jingpynpaw ka jong u, la ong ba ka la don ka jingleit jurip kaba man ka por ia kine ki tynrai dieng.