Haduh jan 500 ngut ki nongrep ki la shah hikai bad pyrshang ia ka rukom rep barim, dang ap ka jylla ia ka jingmynjur ka sorkar pdeng ban nang pyniar

Syllad | The Rising MeghalayaSeptember 23, 2023

Haduh jan kumba 500 ngut ki nongrep ki la ioh jinghikai bad pyrshang ruh ia ka rukom rep barim kaba khlem ai dawai ha ki 25 tylli ki shnong, kata hadien ba ka sorkar jylla ka dang ap ia ka jingmynjur jong ka sorkar pdeng ban nangpyniar ia ki jaka rep ha kane ka rukom jong kiba rim kaba pyndonkam tang da ka sboh khyndew.

Ia kane la pyntip da ka Myntri kaba khmih ia ka Tnat ka rep ka riang ka Kong Ampareen Lyngdoh haba jubab iaka jingiatai ba lyngkot ba la wanrah da u MLA ka UDP na Nongpoh u Bah Mayralborn Syiem ha ka sngi kut jong ka dorbar Synrai haka sngi Thohdieng.

Kane ka Myntri ka la ong ba ka Meghalaya State Rural Livelihood Society (MSRLS) ka la shim ia ki sienjam ban aijinghikai halor ka rukom rep barim ne natural farming ha baroh kawei ka jylla. Ka la ong ba kila poi sha ka jingiamynjur bad ki riew shemphang napoh ka jylla Arunachal Pradesh ha kaba ki la ithuh ia ki 18 tylli ki jaka aijinghikai bad aijinghikai ruh ia kumba 35 ngut ki community resource persons (CRPs) kiba la nangkyntiew bad aijinghikai shuh shuh ha ki thain ki jong ki na ka bynta ban pyrshang ia kane ka rukom rep barim ne tynrai.

Ka la pyntip ba haduh mynta ki la don haduh kumba 475 ngut ki nongrep kiba la ioh jinghikai ha kane ka rukom rep barim, kata ha ki jaka rep kiba kot sha ka 500 akar hapoh ki 25 tylli ki shnong.Hapoh jong kane ka prokram ka MSRLS ka la thaw ruh haduh 380 tylli ki multi-cropped kitchen garden.

Nalor kata ka la ong ruh ba ka Tnat ka la phah ruh ia ka annual action plan na ka bynta kane ka rukom rep tynrai sha ka sorkar India na ka bynta ban ioh ia ka jingmynjur.

“Lada la ioh ia ka jingmynjur na ka liang ka Tnat kan pyntreikam ia kane ka skhim katkum ki jingkdew lyngba ka  Natural Farming Guidelines bad nangpyniar ia ki jaka na ka bynta kane ka rukom rep tynrai ha ka jylla,” ka la ong shuh shuh. Da kaba  pynpaw ka kam rep khlem pyndonkam dawai ne organic farming ka dei kawei pat ka lynti kaba la pynshlur ia ki nongrep na ka liang ka Myntri ka la ong ba ia mynta hi haduh 32000 hectare la pyndonkam ia kane ka rukom rep bad na ka liang ka  Sorkar ka dang thmu ban pyniar shuh shuh sa haduh 50,000 hectare kat haduh ka snem 2030.

“Ym kumba long kiwei pat ki rukom rep, hynrei kane ka rukom rep tynrai kin ym ktah satia ia ka jinglong sboh jong ka khyndew bad kan kyntiew ha kaba iadei bad ka jingpynmih ia ki mar rep kiba bha na ka bynta ka koit ka khiah bad kiba pynioh kham bun ka kamai kajih na ka bynta ki nongrep,” ong shuh shuh ka Myntri.

Halor ki sienjam ban kyntiew ia kane ka rukom rep tynrai ne organic ha ka jylla, kane ka Myntri ka la ong ba na ka liang ka Tnat ka la pyntreikam ia ka Mission Organic for Value Chain Development-North East Region (MOVCDNER) ia kaba la bei tyngka da ka sorkar pdeng ha kaba haduh 28 tyli ki FPO la dep ban pynkhreh ha kaba kila rep da kane ka rukom kaba rim.

Shuh shuh ka la ong ruh ba ka kynhun myntri ka sorkar jylla kala mynjur ia ka Meghalaya State Organic and Natural Farming Policy ha ka 11 tarik Kyllalyngkot 2023. Ka jingthaw ia kane ka polisi ka thmu ban kyntiew ia kane ka rukom rep tynrai ka ban kyntiew ia ka kamai kajih jong ki nongrep.