Haduh 99.41% ioh u samla na East Jaintia Hills ha ka NEET 2025: Pynkup burom ka shnong bad ka kur

Syllad | The Rising MeghalayaJuly 10, 2025

Ka long da shisha ka jingkmen kaba khraw bad kaba pynioh mynsiem ia kiwei pat ki para samla pule jong ka thain bad ka Jylla hadien ba u samla pule na ki thain nongkyndong na East Jaintia Hills District ula ioh haduh 99.41 percentage ha ka jingiakhun ia ka Exam NEET 2025.

Une u samla uba la tip kyrteng kum u Yoonis Lyngdoh khun jong u (L) Pher Dkhar bad Kong Lir Lyngdoh na ka shnong Rangad, East Jaintia Hills District. U la iakhun ia kane ka Exam ha ka sien kaba ar bad ula ioh ula ioh ia kane ka jingjop kaba khraw.

Da ka jingsngew sarong halor kane ka burom kaba u la ioh, ka Dorbar Shnong Rangad ryngkat ka Kur Lyngdoh Rangad kila pynkup burom kum ka jingai mynsiem shuh shuh ia une u samla ha ka jingialang kaba la long hapoh Community Hall jong ka shnong ha ka 8 tarik Naitung.

Ha kane ka sngi la don lang u Myntri sorkar bad MLA ka Khliehriat u Ma Kyrmen Shylla kum u kongsan, u Deputy Chairman ka JHADC u Ma Wailad Dameshwa Siangshai kum u symbud kongsan.

U Ma Kyrmen Shylla ula ai ka jingiaroh ia ka Dorbar Shnong Rangad bad ka Kur Lyngdoh Rangad kiba la pynlong ia kum kane ka jingpynkup burom ka ban nangai mynsiem shuh shuh ia ki samla pule ba kin nanglah ban kiew kham shalor ha ka liang ka pule puthi .

Nalor kata ula kyntu ruh ia u samla Yoonis ban long u samla uba don ia ka mynsiem iai shah khamtam ha ka liang ka pule puthi khnang ba ka lawei jong u kan long kaba phyrnai.

Ula kyntu ruh ia kiwei ki samla pule ban khein kor ia ka jingpule khnang ban ioh ia ka jingnang jingstad kaba kordor bad ban ioh ruh ka jingithuh kaba kyrpang ha ka lawei ban wan.

Ha kane ka sngi la don lang ruh u SDSEO ka EJHD, u Ma Onickson Sumer, u Dr. Phervision Nongtdu Principal Jaintia Eastern College, u MDC barim Ma Joinriwell Pyrtuh, u Waheh shnong bad Secretary shnong Ma Damon Lamo bad Ma Ripos Lyngdoh nalor kiwei kiwei.

La pynphuh pynphieng ia kane ka jingialang ba la pyniaid da u Ma Meki Lamo da ki jingshad ba la shim bynta da ki khun samla ka shnong bad la ioh ia ka jingkren ai khublei na u Ma Shiborlang Lamurong Tresurer jong ka Shnong.