Haduh 4 lak ki longiing kiba la ioh jingmyntoi na ka um ïing lyngba ka skhim JJM ha ka jylla

Syllad | The Rising MeghalayaOctober 25, 2023

Ka jylla Meghalaya kala jam sha uwei pat u mawmer ha ka jingpyntreikam ia ka skhim Jal Jeevan Mission (JJM) lyngba ka jingpynioh ia ki umbam umdih sha ki longiing kaba la kynjoh mynta sha kumba 4 lak tylli ki longiing ha ki thain nongkyndong hapoh ka jylla.

Na ki 4550 tylli ki kor um iing ba la pyntreikam naduh ka 15 tarik Nailar 2019 ka la kynjoh sha ka 4,00,812 tylli ki kor um iing kiba la treikam mynta.

Haba pynbna halor kane ka jingjop kaba kongsan, na ka liang u Myntri Rangbah ka Jylla u Conrad K Sangma, ula  ai ka jingkhublei  ia ka kynhun jong ka Jal Jeeval Mission, Meghalaya.

Na ka liang u Myntri Rangbah ula ong “Ka jylla Meghalaya kala kynjoh sha ka 4 lak ka jingtreikam ki kor um iing lyngba ka skhim Jal Jeevan Mission. Ngi ai khublei bad ai ka jingkitbok ia ka kynhun Jal Jeevan Meghalaya katba ngi dang iai bteng ban kynjoh sha ka 100 % ka jing pynpoi ia ki kor um iing hapoh ka Jylla”.

Kumjuh u Commissioner & Secretary ka Tnat Public Health Engineering Department bad Mission Director ka Jal Jeevan Mission ha Jylla, u Syed Md. A. Razi, ula pynpaw ia ka jingsngew ioh mynsiem da kaba ong “Kane ka dei ka jingkynjoh ia u mawmer hapoh ka Jylla. Ngim ym shongthait hynrei ban iai bteng ban pynlong ia ka Meghalaya kaba shngain ha ka jingioh ia ka umbam umdih hadien habud. Ka thong jong ngi ka long ba ki shnong ha ki jaka ba kyndong eh ka jylla kin ioh ia ki kor um iing bad ngin iai bteng tad haduh ban da poi haduh kaba kut”.

Ka jingseisoh ha kaba iadei bad ka jingpynpoi ia ki kor um iing hapoh ka Jylla ka iapher na kawei ka district sha kawei pat. Ka East Garo Hills kala kot 80.09%, South West Garo Hills – 79.02%, Ri Bhoi – 72.83%, North Garo Hills – 69.35%, Eastern West Khasi Hills – 67.56%, South Garo Hills – 65.56%, South West Khasi Hills – 65.15%, West Garo Hills – 59.82%, West Khasi Hills – 57.52%, West Jaintia Hills – 50.29%, East Khasi Hills – 50.01% bad East Jaintia Hills – 44.50%.

Ha u bnai Risaw 2022, ka jylla Meghalaya kala wan ha ka kyrdan kaba-ar ha ka jinglum jingkhein ha kaba iadei bad ka jinglah ban pyntreikam ki kor um iing jong ka Jal Jeevan Mission.

Ka Jal Jeevan Mission ka dei ka sienjam ba la shim da ka sorkar pdeng da ka jingthmu ban pynioh ia ka umbam umdih kaba shngain bad ba neh sha ki thain nongkyndong kat haduh u snem 2024.Ha Meghalaya, na ki 600,000 tylli ki longiing, mynta ki la don haduh 400,000 tylli ki longiing kiba la ioh ia ka lad ban lehkmen lyngba ki jingmyntoi kiba ki la lah ban ioh ia ki kor um iing lyngba kane ka skhim, kata kaba long haduh 61% na baroh ka jingdon jong ki longiing.