Haduh 300 akar ai jaka ka Tnat Forest ban kyntiew ia ki kam jngohkai ha ki bynta ka pung Umiam

Syllad | The Rising MeghalayaJune 21, 2024

U Myntri ka Tnat Tourism ka sorkar Jylla u Bah Paul Lyngdoh ha ka 20 tarik Jylliew u la ong ba ka Tnat Forest shen kan sa aiti ia ka jaka kaba haduh 300 akar ban pynlong ia ki jaka kiba don hajan ka pung Umiam kum ki jaka jngohkai ba pawkhmat bad ki ban khring ia ki nongwan shangkai pyrthei na kylleng.

Haba kren sha ki lad pathai khubor u Bah Paul u la ong, “Ngi la lah ban jam shakhmat ia ka jingthmu hadien ba ka Tnat Forest ka la pynpaw ia ka jinglong lakloi ban iadon bynta da kaba pynioh haduh kumba 300 akar ka jaka ban kyntiew ia ki kam jngohkai bad ban pynlong ia ka thain Umiam ka jaka jngohkai pyrthei ba pawkhmat ym tang ha Meghalaya hynrei ha ka thain Shatei lammihngi hi baroh kawei.

U pyntip ruh ba kane ka project kaba la angnud bha ka long shibynta ban pyniar ia ka Meghalaya Tourism Development Corporation (MTDC) da kaba wanrah shuh shuh kham bun ki lad jingshakri, ki jaka pynbyrngia bad ban shna shuh shuh ia ki jaka sah nalor kiba la don lypa hapoh Orchid Lake resort.

Nalor kata u Bah Paul u la ong ruh ba kin don shibun ki jingpynbyrngia ia ki nongwan shangkai pyrthei khamtam ha ki jingialehkai ‘water sports’ bad kan don ruh ka jaka iaidkai hapoh Nehru Park, ki jaka ialehkai na ka bynta ki khynnah bad kiwei kiwei.