Haduh 21 tylli ki takma kynthup 9 ki takma ksiar ioh khur ka AMKA na ka rynsan iakop ha Kerala

Syllad | The Rising MeghalayaNovember 24, 2024

Ki khynnah ialehkai na ka All Meghalaya Kickboxing Association (AMKA) ki la lah ban wanrah ia ka nam bad burom ia ka jylla hadien ba ki la ioh ban khur haduh 21 tylli ki takma na ka rynsan iakop ‘National Kickboxing Championship 2024,’ kata ha ka 28th Senior, 27th Junior and Sub Junior kaba la long ha V.K Krishnamenon Indoor Stadium, Kozhikode, Kerala naduh ka 14 haduh ka 17 tarik u Naiwieng, 2024.

Ha kane ka rynsan iakop ba la pyniaid da ka da ka Kickboxing Association of Kerala bad ba la bei tyngka da Indian Association of Kickboxing, ki khynnah ka AMKA ki la ioh ruh ban khur haduh 9 tylli ki takma ksiar, bad mar 6 tylli ki takma rupa bad takma rnong.

Napdeng kiba la ioh khur ia ka takma ksiar ki kynthup 5 ngut ki kynhei bad 4 ngut ki khynnah shynrang. Na ki kynthei ki long ka Amegrace Nongbsap bad ka Ozania Nongbsap na ka Sub Junior, katba ka Rinehskhem Nongbsap bad ka Biaiona Kharmujai na ka Junior Point Fight bad ka Iairisuk Syiem na ka Senior Full Fight.

Katba na ka liang ki shynrang u Riconius Mawlong bad u Mewanpyndap Marpna na ka Sub Juior, u Shanbor Kurbah na ka Junior bad u Kordor Rynjah na ka Senior.

Kumjuh ki 6 ngut kiwei pat kiba ioh khur ia ki takma rupa ki long ka Happiness Manar na ka Junior Point Fight, ka Ibahundaris Kharsyiemlieh na ka Senior K-1, u Meshanbor Nongrum (Sub Junior), u Bisharbniah Mawlong (Sub Junior), u Ribantei Syiemlieh (Junior Full Contact) bad u Royalson Lapang  (Senior K-1)

Nalor kata kii 6 ngut kiwei pat kiba ioh khur ia ki takma Rnong ki kynthup ia ka Dabetshuwa Nongrum (Sub Junior), ka Philarsuk Nongbsap (Sub Junior), u Banshailang Mawlong (Sub Junior), u Sankiskhemlang Syngkli (Sub Junior), u Plassing Mynsong (Seniuor Full Contact) bad u Augustin Mawlong (Sub Junior).