Haduh 200 tylli ki kam tyrwa ka ri Slovakia sha kiba nang kren phareng

Syllad | The Rising MeghalayaNovember 29, 2023

Ki don haduh kumba 200 tyli ki kam kiba lait na bynta kito kiba nang ban kren phareng ne English ha ka ri Slovakia ka ri kaba don ha syndah Poland ha thain Europe. Ia kane la pyntip da u Co Chairman ka Meghalaya State Planning Board u Bah John F Kharshiing hadien ka jingiakynduh bad ka kynhun na Siliguri kaba don jingiadei bad ki ri bapher bapher.

Na ka liang u Bah John Kharshiing la ong ba ia kane la pyntip da u Yash Gurung, CEO & Founder Director, Asporea, Siliguri bad ki officer jong u ha ka jingiakynduh kaba la long ha ka 27 tarik mynta u bnai ha ka nongbah Shillong. 

Nalor kata la ong ruh ba kane ka kynhun na Siliguri kaba la pyntip ba ki don mynta kumba 200 tylli ki kam ha ka karkhana shna kali Peugeot 208, Citroen C3, jong ka Company Stellantis, Slovakia ha ka jingsiew kaba poi kumba 63,000 tyngka haduh 72,000 tyngka shi bnai nalor ba ka don ka jingsiew tam lada ki nongtrei ki trei tam ne ki kham trei smat trei sting.

La ong ruh ba ka kynhun jong ki ka don ka jingiateh bad ka kynhun pynioh kam kaba heh na Kathmandu, Nepal kiba la don lupa ki jingiadei bad katei ka kharkhana shna kali, ha kaba ki don ka lad ban pynioh ïa kitei ki kam lada ki nongwad kam ki don ia ka jingtbit lane ka kyrdan kaba biang. Kane ka kharkhana kali ka dei kaba heh bad ki shna 62 tylli ki kali ha ka shi kynta bad ki pynmih haduh 1395 tylli ki kali shi sngi ha Slovakia,”ong u Bah John ha ka kyrwoh.

Ha katei ka katei ka jingiakynduh katei ka kynhun ka la mynjur ruh ia ki jingai jingmut jong u Bah John ba ia kane ka kam un sa pynbeit ka jingiakynduh bad ki heh jong ka tnat Labour jong ka sorkar Meghalaya ban iakren sngewthuh ban iatrei ryngkat kumno ba ki samla na ITI / Poytechnic bad kiwei kiwei hapoh Meghalaya kin lah ban shim ia katei ka lad ka kabu ban mih shakhmat ban trei shitom ban poi sha kitei ki kam.

Shuh shuh ki la pyntip ruh ba ki don ruh ki kam ba bun jait kiba kane ka kynhun ka la don lupa ki jingiadei ha ki ri ba pher bapher ha kaba ka jingdawa ia ki nongtrei ka jur bha kum ki nos, ki nongtrei hapoh ki jaka sumar hospital bad kiwei kiwei ha Japan bad Germany tangba ha kitei ki ri donkam ban pass shwa ia ar kyrdan kata ban nang ia ka ktien Japan bad German, ong shuh shuh u kyrwoh.

Ha ka juh ka por la ong ruh ba kane ka kynhun ka la pyntip ha u Bah Kharshiing ba kine ki jingplie lad ba ki nong India kin ioh leit sha kiwei ki ri ki dei naduh ba u Myntri Rangbahduh ka Ri, u Narendra Modi u la wanrah ki polisi ban plie lad ia ki nong India ban leit shabar lyngba ki jingiateh bad ki ri bapher bapher lyngba ka Ministry of External Affairs, khamtam namar mynta ka don ruh ka jingsdang duna ka jingdon paid ha kiba bun ki Ri sha Europe.