Haduh 20 snem rai set phatok iaki 3 ngut ba donkti leh beijot

Syllad | The Rising MeghalayaJuly 16, 2025

Ka Iingkashari Special Judge (POCSO) ka East Khasi Hills, ka la rai pynrem ia ki lai ngut ki runar kiba donkti ha kaba leh beijot ia ka khynnah da kaba set phatok 20 snem kynthih ha ryngkat ka kuna kaba mar T.50,000.

Ka Iingkashari ha ka hukum ba la pynbna ha ka 10 tarik Naitung 2025 ka la rai pynrem ia ki lai ngut ki runar kiba la tip kyrteng kum u Raj Roy, u Ashit Chanda bad u Prasenjit Das da kaba set phatok 20 snem kynthih hapoh ka kyndon 6 jong ka POCSO Act namar ka jingdonkti ha kaba leh beijot ia ka khynnah katkum ka case ba la register hapoh Sadar Police Station Case No. 266 (09) 2013.

Lada kim lah ban siew ia kane ka kunar kin hap ban shong tam sa hynriew bnai hapoh phatok.

U Superintendent of Police ka East Khasi Hills, u Bah Vivek Syiem u pyntip ba kine ki laingut ki la shah pynngat hapoh ka ka kyndon 12 bad 17 jong ka POCSO Act bad ka kyndon 506 jong ka IPC.

Ka Iingkashari ka la hukum ruh ban set phatok 2 snem ha ryngkat ka kuna T.10,000 halor ka kam runar hapoh ka kyndon 12 jong ka POCSO Act bad lada kim lah ban siew ia kane ka kunar kin hap ban shong tam sa 3 bnai ha phatok.

Hapoh ka kyndon 17 jong ka POCSO Act ka la hukum ban set phatok ia kine ki runar 10 snem ryngkat ka kuna T.20,000, bad lada kim lah ban siew kin hap ban shong tam ha phatok sa lai bnai.

Nalor kata hapoh ka kyndon 506 IPC la rai pynrem pyrshah ia kine ki lai ngut da kaba set phatok 2 snem ha ryngkat ka kunar T.10,000 bad lada kim lah ban siew kin hap ban shong phatok sa lai bnai.

Ia kane ka jingjia kam thombor la pynlong jingtohkit da ka WPSI MM Momin kaba don mynta ha Resubelpara, North Garo Hills.