Hadien shibnai kynnoh wan jynrat biang u paid Karbi iaki dieng naka skim sorkar ha Lapangap

Syllad | The Rising MeghalayaAugust 18, 2023

Hadien shibnai ki paid Karbi na ki thain Tahpat kila wan ban jynrat naphang iaki tynrai dieng kiba la thung haka shnong Lapangap ban pynjyrngam biang iaka sawdong sawkun ki lum ki wah ba syllen haka sngi Thohdieng.

Kine ki dieng ki dei kiba la ai da Meghalaya Basin Development Authority (MBDA), West Jaintia Hills lyngba Japan International Cooperation Agency (JICA).

U Waheh Shnong Lapangap u ma Deimonmi Lyngdoh ula iathuh bad da ki hajar ngut ki paid Karbi na ki thain Tahpat kiba dang hap ha ki jaka iakajia khappud hapdeng Meghalaya Assam ha ka jingsynran ki dkhot ka Karbi Students’ Association (KSA) kila wan ban jynrat biang iaki dieng kiba kila thung ha u bnai Jylliew une u snem.

Jynrat naphang ki paid Karbi bad Pulit Assam iaki dieng palat 800 tynrai ha Lapangap kiba ioh naka JICA

Ula iathuh ba ka sien kaba nyngkong ki nong Karbi kila wan jynrat ia kine ki dieng dei ha u bnai Naitung bad kane ka dei ka sien kaba ar. Ula ong ba kane ka jaka ka dei kaba la tip kum Lum Moo Pyrdet Pynthor kaba hap haka jingsumar sukher ka shnong Lapangap.

Mar syn ioh jingtip halor katei jingthmu sniew jong ki Karbi, kumba shispah ngut ki nongshong shnong ka Lapangap ki la leit her bran bran sha katei ka jaka ban iada ia kitei ki dieng tynrai, hynrei ka jingpyrshang jong ki nongshong shnong Lapangap ban iada iaki tynrai dieng ka kti ki nong Karbi, pynban kila shah lun maw ha ki nong Karbi hynrei ym shym ladon ba mynsaw.

Ka la don ruh ia ka thma ktien hapdeng ki nong Karbi bad ki nong Lapangap hynrei la lah noh ban tem noh ia kane ka jingjia na ka jingdon ki pulit na baroh ar liang ki jylla.

Hadien ka jingiania kaba la neh khamslem la ra ban pynneh katkum ba long mynta tad haduh bala pynbeit da ki bor district ka West Karbi Anglong bad West Jaintia Hills, kaba nakaliang ka shnong Lapangap kala dep ujor naduh u bnai Naitung.