Hadien ba byrthen ka KSU, pynpaw u CM ka jylla ba ki kam ialeh pyrshah kim dei ka lynti halor ki kam iakajia pud

Syllad | The Rising MeghalayaSeptember 15, 2023

U Myntri Rangbah ka jylla u Conrad K Sangma haka sngi Palei u la ong ba ki kam ialeh pyrshah kim dei satia ki lad ki lynti kiba lah ban weng halor ki kam kiba iadei ba ka jingiakjia pud hapdeng ka Assam bad ka Meghalaya.

Kane ka jingpynpaw jong u CM ka la wan long ruh hadien ba ka  Khasi Students’ Union (KSU) Laban Circle ka la maham ban khang khyrdep ia ka Karbi Hemtun (Guest House) lada ki nong Karbi bad ka sorkar Assam ki iai bteng ban kyntur pud bad leh ia ki kam thombor pyrshah ia ki trai shnong Khasi Pnar ha ki thain khappud hapoh West Jaintia Hills District.

Haba kren sha ki lad pathai khubor u Conrad Sangma u la ong; “Ngi dei kiba im hapoh ka ri India bad ngi hap ban iakren iasyllok bad im hapdpeng ka jingsuk. Ki don ki jingeh ki jingwit kiba ngi hap ban iapynbeit, hynrei ym dei satia da ka lynti jong ka jingialeh pyrshah.”

Nalor kata u la ong ruh ba yn lah ban weng ia ki jingeh tang lyngba ka lynti jong ka jingiakren iasngewthuh bad ka jingshaniah, bad kumta ruh ngi donkam ban pynthikna ba ngin don ia kata ka jingshaniah bad ki para marjan jong ngi bad ruh ban wad ia ki lad ki lynti kaba lah ban pynhun bad pynbiang lang.

U Sangma u la ong ruh ba lada ngi kwah ban buh ia ka Meghalaya House ha Assam lane ha Guwahati bad lada don kiba maham bad khanglad, ngam tharai ba kane kan dei ka lynti jong ka  jingshaniah.

“Hooid, Ngam ong ba kam don ka jingsngewkhia hynrei ban weng ia kine ki jingsngewkhia ka lynti jong ka jingialeh pyrshah kam dei satia kaba lah ban iarap ban weng ia kine ki jingeh. Ngi donkam ban iatreilang bad wanrah ka jingshaniah markylliang ha ka rukom kaba dei, bad kane ka dei ruh ka khubor kaba la mih na ka jingialang hapdeng jong u bad u Myntri Rangbah ka Assam u Himanta Biswa Sarma kaba la long ha ka sngi Balang ba lah,” ong shuh shuh u CM ka jylla.