Hadien ba bishar bniah biang ka MBOSE, pass ka samla ha ka 9th Position

Syllad | The Rising MeghalayaJuly 3, 2024

Namar ka jingbym hun ia ka jingioh Marks ha ka result HSSLC kaba dang shu pynbna shen da ka Meghalaya Board of School Education (MBOSE), kawei ka samla kaba kyrteng ka Balarisuk Myria na ka shnong Nartiang kaba pule ha class XII Science ha St. Edmund’s College kaba la duna tang lai mark ban wan ha ka kyrdan Top Ten ka la phah ban bishar bniah biang (Re-evaluation) sha ka MBOSE ia ka paper jong ka, bad hadien ba la dep ban bishar bniah ka la ioh sa 7 mark na kaba duna bad poi ha ka kyrdan Top Ten, kata ha ka  9th Postion.

Kane ka samla ha ka jingsynran lang da kiba haing hasem jong ka, ka la ong ba ka la ap khmih bha ban poi ha ka kyrdan First Ten Postion namar ka jingsngewthuh ia ka jinglah bad ka jingkotbor ka jong ka.

Kumta ruh kam banse ban phah bishar bniah biang ia ka paper jong ka, bad hadien ba la pyndep ia kane ka la pynpaw ia  ka jingkmen kaba khraw ban ioh rung ha ka thup jong ki Top Ten.

Na ka liang kane ka samla ka kyntu ruh ia ki kiwei pat ki samla ba lada kim sngewhun ia ki Mark jong ki kumba ki la khmih lynti ki dei ban mih shakhmat ban phah bishar bniah biang. Ha kajuh ka por kane ka samla ka  kyntu ruh ia ki bor pyniaid ka MBOSE khamtam kiba shimti ban correct ia ki paper ba ki dei ban da peit bad bishar bniah.