Ha u Nailar 2024 yn pyndep noh ka jingtei ia ka iingdorbar Assembly ka jylla

Syllad | The Rising MeghalayaOctober 26, 2023

U Symbud Myntri Rangbah ka jylla uba khmih ia ka Tnat PWD (Buildings), u Bah Prestone Tynsong haka sngi Palei u la khot ia ka jingialang bishar kam bad pyntip ba ia ka jingtei bathymmai jong ka iingdorbr Meghalaya Legislative Assembly ka jylla ha Mawdiangdiang yn  pyndep noh ha u bnai Nailar 2024.

Haba kren sha ki lad pathai khubor, u Bah Tynsong u la ong; “Ngi la bishar bniah ia ki jingtreikam baroh bad mynta ka jingpyntrei ka dang iaid shakhmat bad Nga thikna kin lah ban pyndep noh katkum ka por ba la buh da ka sorkar bad kata ka dei ban long ha lane shwa u bnai Nailar 2024.”

U la ong ruh ba ka jingshna ia u dome bathymmai jong kane ka iingdorbar kan sa sdang noh shen.

“Mynta ki la lah ban pynkhuid lut ia baroh ki jingjulor bad ka jingsdang ia ka tyllong ne foundation ka la sdang iaid shakhmat, bad mynta ki la dep ruh ban order ne thied ia ki tiar ki tar ba donkam bad shen kin sa wan poi ha kane ka jaka bad ban sdang ban pynbit pynbiang ia ki,” ong u Bah Tynsong.

Nalor kata une u Myntri u la ong ruh; “Kam don ka jing jinglut tam lyngba katei ka jingkhyllem jong utei u dome, hynrei ka jinglut ka long halor ka jingdonkam shuh shuh ia ki tiar ki tar,  hynrei Ngam don hangne ia baroh ki jingbatai bniah namar ngi dang donkam ban iakren biang ha ka jingialang namar kane ka jingialang ka dei tang bad ka tnat PWD building bad ki kontraktor kumjuh ka PMC.”

Nalor kata u pynpaw ruh ia ka jingsngew skhem ba ka Meghalaya Legislative Assembly kan ioh ban shong ia ka jingialang dorbar kaba nyngkong eh ha katei ka jingtei kaba thymmai ha une u bnai synrai u ban wan.