Ha u bnai ban wan yn leit jurip ki Regional Committee ka Meghalaya, Assam ia ki shnong kiba hap hapoh Langpih sector

Syllad | The Rising MeghalayaAugust 28, 2023

Mynta ka sngi Nyngkong ki Regional Committee ka Meghalaya bad Assam kila rai ban pynlong ka jingleit jurip ia ki shnong ki thaw kiba don ha ka thain Langpih sector ha une u bnai Nailur u ban wan, kata hadien ba la kut ka dorbar synrai ha baroh kine ki artylli ki jylla.

Haba kren sha ki lad pathai khubor u Myntri ka sorkar jylla uba dei ruh u Chairman ka regional committee na ka bynta ka West Khasi Hills u Paul Lyngdohg u la ong  ba ka jingialang kala lah ban pynduna ia ka jingdon jong ki jaka kiba don hapdeng ka jingkajia pud, kata ia kito ki jaka ba la kam trai da da ka Meghalaya bad Assam.

U la ong ruh ba ki dkhot jong ka District Council (MDC) bad ki Deputy Commissioner jong baroh ar tylli ki jylla kila shah pynkhamti ia ka kam na ka bynta ban pynkhreh ia ka thup kyrteng jong ki shnong ki bym don ka jingiakynad ne jingkajia, ha ka jingialang ka ban wan, kata hashwa ba kin pynlong ka jingleit jurip lang ia ka thain khappud.

Katba na ka liang u Chairman ka regional committee na ka bynta ka Kamrup district sector u Chandra Mohan Patowary ula ong ba ka jingiakren ka long kaba sngewtynnad bad kaba seisoh bad baroh ar tylli ki jylla kila dep ban ai markylliang ia ki jingthoh ha kaba iadei bad ka jingkam trai ia ki jaka ki puta ha ka thain Langpih.

Kham hashwa u la ong ba ki don bha ki jaka ba don haka jingiakajia, hynrei mynta ki la lah ban pynduna noh bad u kyrmen ba hadien ba la kut ka dorbar jong ka jylla Meghalaya bad Assam ha u Nailur, kin ia leit ban jurip lang ia ka thain Langpih bad kin sa pynbeit ia ka tarik obad hadien ba la dep ban wan jurip, ki ngeit skhem ba kin lah ban pynkut noh ia ka jingiakren ia pynbeit ha kaba iadei bad kane ka kam iakajia pud hapdeng kine ki ar jylla.