Ha ka 9 tarik yn shim bishar ka SC ia ka jingujor ka NESO pyrshah ia ka CAA 

Syllad | The Rising MeghalayaMarch 20, 2024

Ka iingbishar Supreme Court kala buh tarik haka 9 tarik u Iaiong 2024 ban shim bishar ia ki jingmudui ban pynsangeh pyntreikam ia ka Citizenship Amendment Act (CAA) hapoh ka Ri. 

Kane ka long katkum ka jingpyntip da u Chairman ka North East Students Organisation (NESO) u Bah Samuel B Jyrwa, kata hadien ba mih na ka iingbishar Supreme Court kaba shong bishar ia ka mukotduma haka 19 tarik Lber.

Nalor kata u Bah Samuel u la ong ruh ba ka iingbishar ka la phiah la ka jong ia ka jingshim bishar na ka bynta na ka Assam, Tripura bad ka NESO kaba mihkhmat ia ka thain Shatei Lammihngi (Northeast) baroh kawei nalor kiwei pat ki jylla jong ka Ri India.

Ka Supreme Court ka la thung ruh ia u Ankit Yadav uba dei u nong iasaid ain na ka bynta ka AASU bad ka NESO kum u Nodal Officer na ka bynta ki nong ujor. Nalor kata ka la hukum ruh ia ka Sorkar India ba kan ai ia ka jubab sha ki nong ujor shwa ka 9 tarik u Iaiong u ban wan.

Lah ban kdew ba ki nongialam jong ka NESO ki la leit sha Delhi ban ujor halor ka jingpyntreikam ia ka Citizenship (Amendment) Rules, 2024 bad kyrpad ia ka iingbishar ba kan pynsangeh noh mardor ia kane ka Rule ba la pynmih dang shen da ka Sorkar India.

U Bah Jyrwa u la ong ba watla ia kane ka ain la pyllait ban pynjari ha ki jylla ba la shah kdup ha ka Inner Line Permit (ILP) ba kynthup ia ka jylla Mizoram, Nagaland bad Manipur bad kumjuh ruh ha ki jylla ba hap hapoh ka Khyrnit ba Hynriew ka Riti Synshar ka Ri India ba kynthup 98% ha ka jylla Meghalaya, 70% ha ka jylla Tripura bad ha ki 8 tylli ki District jong ka jylla Assam, hynrei ha ki 27 tylli ki District jong ka jylla Assam ym shym la pyllait satia bad kiba buh ka jingma kaba khraw ia ka thain Northeast hi baroh kawei ha kine ki sngi ki por ki ban wan.

Kumta khnang ban iada ia ki jaidbynriew ritpaid ka thain shatei lammihngi kiba la shah ktah lypa na ka jingwan rung kyrthep jong ki mynder ri na ka ri Bangladesh, la donkam ba ia ka Citizenship Amendment Act 2019, ong shuh shuh u Chairman ka NESO.