Emkaam wow lehwarom ya ka 30 Kmaichonglad ha kylleiñ yow tip chaphang u Kiang Nangbah: Santa Mary

Syllad | The Rising MeghalayaDecember 30, 2023

Ynne ka sngi ka 30 tarik kamwa jooh leh man u snem ka Kiang Nangbah Iasiat Khnam Memorial Society (KNIKMS) da kynmoo warom ko ya i dap lyngkhooh snem wa 161 snem wa chah pasi u Woh Kiang Nangbah haphrang u mot sahnaam yong uni u khlawait ka ri, ha Madiah Kmai Blai, Syntu Ksiar, Jowai.

Ha kani ka sngi ka MLA ka Sutnga Saipung, ka Santa Mary Shylla da man ko kam ka kongsan katwa u A. Lakiang u Joint Secy Governor Secretariat, Raj Bhawan Shillong da man u kam u symbood kongsan.

Chwa wow sdang ka yalang da lai booh syntu ha u mot sahnaam u Woh Kiang Nangbah wei i pynher ya ka lama ka seiñ da kongsan.

U A. Lakiang hawa e yei klam da khana u ya ka parom wa tbian yong u Woh Kiang Nangbah heiwa da ong u wa i rukom lehthma khloo (Guirella Warfare) da pynchitom i ya ki chipai pharæng neibhah ymyoo ki heiwon em ki chipai u Woh Kiang Nangbah.

Da ong u leh wa ka sorkar India da tipmit ko ya u Woh Kiang Nangbah wei man u kam u heh chipai namo u General wow yahkhmat ya ki chipai yong oo kamjooh leh man u kam uwa da khana chwa neibhah katkam ki kyntien khaddooh u ka ri leh da laitlooid ko hapoh chispah snem.

Ka Santa Mary Shylla hawa e yei klam da ekhublei wei da yaroh ko ya ka seiñ wa ye ko u pynman kam kani ka yalang man u snem wei kani man ko kam ka laad wow tip kiwa ymtip chaphang ka parom u Woh Kiang Nangbah.

Chooh chooh da ong ko wa emkaam wow lehwarom ya ka 30 Kmaichonglad ha kylleiñ ki chnong ka Ri Jaiñtia yow tip ki chaphang u Woh Kiang Nangbah.

Ha kani ka sngi da yoh leh i klam na u C. Najiar, u President ka seiñ, i ngooh Blai na u Dauruhiwaot Lamare, i klam na u Riquoma Rq Laloo, uwa man u E.C Member wei da saam leh ya ki khusnaam cha kiwa jop ha ki yakob wa da pynman da ka seiñ ha ki sngi wa dadep.

Da pynphooh ya kani ka sngi da ki sur na ka Morealda Paswet, Chaad Pliang wa da pynkhreh da ka Arts & Culture KNIKMS, i lehke chaphrang ka parom u Woh Kiang Nangbah wa u Kiri Dolloi na ka LSC Production, Shangpung.