Durand Cup 2025: Yn pynlong ha ki 5 Jylla; 8 tylli ki jingialehkai yn iakhun ha Shillong

Syllad | The Rising MeghalayaJuly 10, 2025

Ka Indian Oil Durand Cup kaba dei ka lympung ialehkai phutbol kaba la rim tam ha ka dewbah Asia kan sdang naduh ka 23 tarik Naitung 2025, ia kaba yn pynialehkai ha ki santylli ki jylla jong ka ri kaba kynthup ha Meghaya.

Ka jingpynkhreh ka Jylla ia kane ka Durand Cup kaba 134 ka la iaid shaid shaid ha ka sien kaba ar kynthih ha kaba ka jingrwai Anthem na ka bynta ka Meghalaya ban pynshongshit shuh shuh ia kane ka lympung ialehkai ka ban wan ka long, “Here We Go.’

Ia kane ka lympung ialehkai mynta u snem yn pynlong ha ki san tylli ki Jylla, kata ha West Bengal, Assam, Manipur, Jharkhand bad Meghalaya, ha kaba ka Nongbah Shillong kan dei ka jaka kaba kongsan ha kaba kan ioh ban sakhi haduh phra tylli ki jingialehkai, kynthup kawei ka quarterfinal bad ka semifinal ha JN Sports Complex.

Na ka liang u Myntri Rangbah ka Jylla u Conrad K Sangma u la pyllait ia ki trophy kiba la wan poi ha ka nongbah Shillong ha ka sngi ba Ar ba la lah ia kiba yn pyniaid kylleng ka sor Shillong, sha Nongstoin bad Tura ha ka jingialang kaba lalong ha State Convention Centre ha ka jingiadon lang u Myntri ka Tnad Sports u Bah Shakliar Warjri, ki Heh shipai kaba kynthup ia u Air Marshal Suraj Singh, u Lieutenant General Sanjau Malik bad Mohit Malhotra nalor kiwei.

Ha ka jingkren u Myntri Rangbah u la pynpaw ka jingsngew sarong ban ioh ia ka lad ban pynlong biang sa shisien pat ia kane ka lympung ialehkai kaba la rim tam ba la pyniaid da ki shipai ka ri India ha kane ka nongbah Shillong.

U la ong ba ki sienjam ba la shim da ka sorkar ban kyntiew ia ka sports ha kine ki hynniew snem kiba la dep ka la pynkylla dur shibun haba ia nujor bad ki snem kiba hashwa ha kaba haduh jan kumba 70% na ki jingtei ia ki madan ialehkai la tei ha kylleng ka jylla ha ka jinglut kaba kot palat T.2000 klur.

U la ong ba ka Sorkar ka dang iaid shakhmat ban tei ia Mawkhanu Sports Complex kaba dei ka football stadium kaba heh tam hapoh ka dewbah Asia bad ka ban ngiam haduh 40,000 ngut ki briew, ka jingkyntiew kyrdan ia ka JN Sports Complex, Mawdiangdiang Sports Complex, PA Sangma Sports Complex ha Tura, Integrated Hospitality and Sports Complex, Shillong, Wahiajer Sports Complex ha Jowai, PA Togan Athletic Stadium ha Tura nalor kiwei kiwei.

Nalor kata u la ong ruh ba ka sorkar ka don ia ka jingangnud ban pynlong ia ka Shillong kum ka Football Capital ka India da kaba shim ia ki sienjam ban kyntiew ia ka jingdon jong ki madan ialehkai kiba paka ha kylleng ki District ka Jylla.

U Myntri ka Tnad Sports, u Bah Shakliar Warjri ha ka jingkren u la ban jur ia ka jingieit jong ki nongshong shnong ka jylla ia ka jingialehkai phutbol da kaba kdew ruh ia ka jingkmen ha ka por ba la ioh ban pynlong ia ka Durand Cup kaba la dep. U la ong ba ka Sorkar Jylla ka kut jingmut skhem ban pynbiang ia ki madan ialehkai ban kyntiew shuh shuh ia ki kam ialehkai sports.U la ong ruh ba ka thong ba kongsan jong ka sorkar kalong ban pynmih ia ki nongialehkai Olympic na ka jylla Meghalaya.

U Myntri u la pynbna ruh ia ka grant kaba kot T.39.17 klur sha ki 26 tylli ki sports association na ka bynta ban kyrshan ha kaba iadei bad ka jingpynkhreh ia ka  National Games 2027 ha ryngkat ka thong ban khubor haduh kumba 50 tylli ki takma.

Katba na ka liang u Lieutenant General Sanjay Malik ha ka jingkren u la ong, “Ka long ka burom kaba khraw ban ioh ia ka lad ban wanrah biang ia kane ka lympung ialehkai phutbol Durand Cup kaba la rim tam ha kane ka nongbah Shillong sa shisien pat.Ngi sngewnguh shibun ia ka Sorkar Meghalaya halor ka jingkyrshan kaba ka la ai na ka bynta ka jingpynbit pynbiang ia ka madan ialehkai bad kiwei pat ki lad jingkyrshan.”