Duna 200 tylli ki sniang kila iap, ka sorkar kam pat lah pynthikna ba iap na ka khlam African Swine Fever

Syllad | The Rising MeghalayaAugust 6, 2020

Ka jingiap pang khlam ki sniang ha Rilum Jaintia kala kiew haduh 198 tylli, katba ka sorkar Jylla haduh mynta kam pat ban pynthikna la kane ka khlam ka dei ka African Swine Fever (ASF).

Ka khubor kaba iohlum na East Jaintia Hills tang na ka shnong Wapungskur ki sniang kiba la iap kila kot haduh 25 tylli. Katba na War Jaintia ka jingiap ki sniang ha Lamin bad Sohkha Shnong kala kot 173 naduh u bnai Jymmang 2020.

Ha Wapungskur ha kine ki khyndiat taiew la report bala ioh haduh 14 tylli bad 2 tylli kila iap haka sngi ba ar bad 9 tylli haka sngi Balang.

Haduh bala thoh iaka khubor ki dang don ki sniang kiba shitom jur iathuh u Waheh Shnong ka Wapungskur, u ma Satly Ryngkhlem uba dei ruh u trai jong kine ki sniang kiba la iap.

Haba iakren bad u nongthoh khubor jong u syllad.com, ula iathuh ba ka jingiap jong kine ki sniang ka dei ka jingduh kaba khraw ia u kum u nongri sniang. “Haba biang ka iew haduh 20-22 hajar nga dang lah ban die iaki sniang kiba heh, kiba rit 3-4 hajar, hynrei kane ka jingkhlad kine ki sniang kala wanrah ka jingduh nong kaba la kot da ki lak tyngka,” ong u ma Satly Ryngkhlem.

Ki doktor bad ki nongtrei ak tnad Animal Husbandry and Veterinary jong ka district kial wan shim nongmuna iaka snam bad pyndep ruh iaka post mortem ban pynthikna na kaei ka daw ba iap ki sniang.

Watla ka jingiap jong ki sniang kala nang nang kiew, hynrei ka sorkar haduh mynta kam pat lah ban pynthikna bad dang ap iaka report.

http://megahvt.gov.in/miscellaneous/ASF_KHASI.pdf