Donkti ka khynnah 16 snem bad 2 ngut ha kaba pajut soh shkor na ki khynnah skul ha Mawlai

Syllad | The Rising MeghalayaJune 23, 2025

Ki pulit ka Mawlai Police Station haka Sngi U Blei ki la ioh ban kem noh ia laingut ki runar kaba kynthup ia kawei ka khynnah kynthei kiba donkti ha ki jingjia pajut soh shkor na ki arngut ki khynnah skul kiba dang rit ha ka thain Mawlai.

U Superintendent of Police ka East Khasi Hills, u Bah Vivek Syiem u pyntip ba kine ki lai ngut ki kynthup ia kawei ka khynnah kynthei kaba dang 16 snem 9 bnai, u Mabanker Jyrwa 23 snem na Jaiaw Lansonalane bad u Charles Myrthong 20 snem rta na Riatsamthiah

“Ki pulit ki la ioh ban kurup noh ia kine ki jingdeng ksiar kiba la shah tuh hadien ba kane ka khynnah kaba la shah kem ka la leit ialam ia ki sha ka dukan die ksiar kaba kyrteng ka New Oscar Jewellers Shop kaba don ha Mawbah,” u la ong.

Ki pulit ki la shim ia kane ka sienjam ban pynlong ka jingthwet kaba jur ia kine ki runar kiba donkti ha kine ki kam tuh hadien ka jingmudui ejahar da kiba haiing hasem jong ki lanot ha ka 18 bad 20 tarik Jylliew.

U Bah Vivek u pyntip ba ka Kong Elinda Marbaniang kaba shong ba sah ha Mawlai Nongkwar ka la iathuh ba ha ka 18 tarik Jylliew ha ka por kumba 1:30 haduh 2 baje nohphai sngi, ka khun jong ka kaba dang 9 snem rta ka dang wan na skul hadien ba kawei ka khynnah ka la buddien ia ka naduh ka lynti iaid kjat na Wahumkhrah bad kylli ia ka khun jong ka la ka ithuh ne em ia uwei u khynnah uba kyrteng u Adrian uba shong klass III ia kaba kane ka khynnah ka la ong ba kam ithuh satia.

Kane ka kynthei ka la buddien ia kane ka heprit haduh Mawlai Nongkwar Block-2 bad hadien ka la ktah ia ki shkor jong kane ka heprit bad pajut jubor ia ki soh shkor hashwa ba kan phet krad na kane ka jaka.

U SP u pyntip ruh ba kawei pat ka longkmie kaba kyrteng ka Kong Sumardiam Kharlukhi kaba shong ba sah ha Mawlai Nonglum ha ka 20 tarik Jylliew ka la mudui ejahar da kaba pyntip ba ha kane ka janmiet ha ka por kumba 4 haduh 4:30, laingut ki briew ki bym lah ban ithuh kaba kynthup ia kawei ka kynthei bad ar ki shynrang ki la wan sha ka iingsah jong ka katba ka khun ba dang 9 snem jong ka ka dang ialehkai shabar. Kane ka kynthei la iathuh ba ka la ot jubor ia shiliang ka soh shkor ka mon bad phet krad na kane ka jaka.

Ki pulit mynta ki dang pynlong ia ka jingtohkit kaba bniah pyrshah ia kine ki lai ngut ki runar.