Donkam pynkhlain ka Jylla ia ki lad jingiada ba dang shimpor ka Sorkar Pdeng halor ka ILP

Syllad | The Rising MeghalayaJune 11, 2025

U Nongaiktien ka Sorkar uba dei ruh u Myntri, u Bah Paul Lyngdoh ha ka 10 tarik Jylliew u la ong ba ka Meghalaya ka donkam ban pynkhlain ia ki lad jingiada katba ka dang ap ia ka jingmynjur na ka Sorkar Pdeng ban pyntreikam ia ka Inner Line Permit (ILP) namar ka lah ban dang kham shim por.

Haba kren sha ki lad pathai khubor, u Bah Paul u la ong ba ka ILP ka dei ka mat jingdawa kaba dang iai bteng bad ka dei ruh ka mat kaba kongsan kaba la dep pynskhem da ka Iingdorbar thaw ain ka jylla.

“Ka dang dei ka jingdawa kaba shong nongrim bha hynrei ha kaba kum kane ka khep nga lah ban ong ba ngi dei ruh ban pynkhlain ia ki lad jingiada namar ban ap ia ka jingmynjur jong ka Sorkar Pdeng halor ka ILP ka lah ban dang kham shim por. Ha ka jingshisha ka la shim por shibun,” u la ong.

Haba pynpaw ba na ka liang ka sorkar kan nangpynkhlain bad pynthymmai ia ka Standard Operating Procedure (SOP) na ka bynta ki lad jingiada bad ka jingshngain jong ki nongshong shnong bad ki nongwan shangkai sha ka jylla, u Bah Paul uba khmih ruh ia ka Tnad Tourism u la ong, Ngi don ruh ia ka Meghalaya Residents, Safety and Security Act (MRSSA), ia kaba donkam ban pynkhlain shuh shuh”.

Ka jingdawa ban pyntreikam ia ka ILP ka la nangjur ha ka jylla khamtam hadien ka jingseisoh ha kaba iadei bad ka jingtohkit halor ka jingjia shah pyniap jong u nong Indore uba wan shangkai sngewbha sha ka ka thain Sohra.

Katkum ka jingpynpaw da ki sengbhalang kiba ialam khmat ia ka jingdawa, ka ILP kan long kum ka jingkhanglad kaba khlain ia ki briew kiba wan sha kane ka jylla da ki jingthmu ban leh ia ki kam pyntriem.