Donkam ban pynphriang ia ka Yoga ha ka imlang sahlang: Dr Ampareen

Syllad | The Rising MeghalayaJune 22, 2025

Ka North Eastern Institute of Ayurveda & Homoeopathy (NEIAH) ha ryngkat ka jingiatreilang bad ka Raj Bhavan, Shillong, ka la rakhe ia ka “11th International Day of Yoga” ha ka prokram ba la pynlong hapoh Convocation Hall, NEHU ha ka 21 tarik Jylliew 2025.

Haba aijingkren kum ka Kongsan ha ka jingialang, ka Myntri ka Tnad ka koit ka khiah ka Jylla ka Dr Ampareen Lyngdoh ka la ban jur halor ka jingdonkam ban pynphriang ia ka Yoga ha ka imlang sahlang na ka bynta ka koit ka khiah jong baroh, da kaba bynrap ba kum kine ki sienjam kan iarap ia ka Ri India ba kan lah ban sei ia ka pateng jong ki khun samla kiba koit ba khiah ha ka met ka phad bad ki jingmut jingpyrkhat,

Ha ka jingkren pdiang na ka liang u Dr. BDR Tiwari, IAS, Commissioner & Secretary sha u Lat ka Jylla Meghalaya u la pynpaw halor ka jingkongsan jong ka Yoga bad ka bynta ba kongsan jong ka NEIAH ban kyntiew bad pynsaphriang ia ka Yoga.

Katba u Prof. (Dr.) Vijay Kumar, Director (i/c), NEIAH u la ai ia ka jingkren ai mynsiem bad kyntu kynpham ia ki samla da kaba  ban jur halor jingmyntoi na ka jingleh Yoga na bynta ka jingkoit jingkhiah jong ka met ka phad bad ki jingmut jingpyrkhat.

Shi bynta jong kane ka prokram la pynlong ruh ia ka Common Yoga Protocol ba la ialam da ki riew shemphang ha ha ka jingleh Yoga.

Hadien kane ka sam ruh ia ki khusnam sha ki nongiashim bynta ha ki jingiakop  bapher bapher.

La pynkut ia kane ka prokram da ka jingkren ai khublei na u Dr. Pradip Mohurle nongpyniaid jong ka IDY 2025, NEIAH.

Shi bynta jong kane ka jingrakhe ha kine ki bnai ba la dep la pynlong ruh ka jingsam ia ki 1500 tylli ki tynrai dieng sha ki college bad ophis ban pynkiew ia ka jinglong jingman jong ka mariang .

Ki jingiakop ba la ioh ban pynlong ki kynthup ia ka Yoga Asana, painting bad photography.

Nalor kata la pynlong ruh ia ka Yoga Protocol Demonstrations ha ki skul, ki college, ki ophis bad ki jaka jngohkai pyrthei  ha kylleng ka jylla Meghalaya.

Kumjuh la pynsngew ruh ia ki jingkren shaphang ka Yoga lyngba ka All India Radio bad Doordarshan Shillong ban pynsaphriang ia ka jingmyntoi jong ka yoga.