Dkoh treikam ka PHC Iooksi bym biang mobile network ong ka KSU

Syllad | The Rising MeghalayaAugust 4, 2022

Ka Khasi Students’ Union (KSU) Kupli Area Circle kala dawa iaka company Jio bad Airtel ban pynbiang iaka mobile network haka thain Iooksi, Saphai, Khonshnong nalor kiwei kiwei ki shnong ba marjan.

Ka KSU Kupli Area circle hapoh ka jingialam general secretary Leiki Richard Tyngkan haka sngi Balang kala ai da ka dorkhat ha ki nongpyniaid ka Jio bad Airtel ha jowai ban dawa pynbiang iaka mobile network ha katei ka thain kaba ki paidbah nongshong shnong kim ioh myntoi naka jingwan kine ki company phone namar ba bun ba thud ka network.

Ka jingbymbiang ka network ka wanrah shibun ki jingeh iaki paidbah khamtam haka pang ka shitom bad kumjuh iaki khynnah skul mynta kiba bun ki klas ki hap ban leh online, la ong ka KSU bad bynrap ruh ba bunsien tang shu lip ka bording ka network ruh kala duh.

Ka KSU kala ong ba ki nongtrei ka Primary Health Centre, Iooksi bun bun sien kila ujor namar ka jingbym biang network kaba la wanrah jingeh bad pyndkoh iaka jingtreikam jong ki.  

Ka KSU kala dawa na kine ki ar tylli ki company, Jio bad Airtel ban pynbiang iaka jingshakri jong ki da kaba pynbiang iaka network mobile ha katei ka thain bad kala ong kam dei shuh ban ioh ia kum kine ki jingujor na u paidbah nangne shakhmat.