Dep aiti ka Sorkar palat 97 percent ka jaka sha ka NHIDCL ban shna surok Shillong Western Bypass: Prestone

Syllad | The Rising MeghalayaMarch 14, 2025

U Symbud Myntri Rangbah ka Jylla uba khmih ia ka Tnad PWD (Roads) u Bah Prestone Tynsong u la pyntip ba haduh 97.5 percent ka jaka la dep ban aiti sha ka National Highway & Infrastructure Development Corporation Limited (NHIDCL) na ka bynta ka jingshna ia ka surok Shillong Western Bypass.

“Ha kaba iadei bad ka 2.5% ka jaka kaba sah na ka liang ki Deputy Commissioner ka East Khasi Hills bad Ri-Bhoi District ki dang iaid shakhmat ban leh ia kaba donkam khnang ban pynthikna ba ngin lah ban pynbeit ia baroh ki jingeh ba la pynpaw da ki trai jaka,” ong u Bah Prestone haba jubab hapoh ka Iingdorbar ha ka kynta buh jingkylli haka 13 tarik Lber.

U la ong ruh ba T.455,39,34,752 klur la pynlut na ka bynta ka jingthied jaka na ka bynta ka project katkum ka RFCTLARR Act, 2013 ha East Khasi Hills District bad T. 121,40,63,701 Klur ha ha Ri Bhoi.

Nalor kata u Bah Prestone u pyntip ruh ba ka jingpyntrei ia ki laitylli ki song jong ka project mynta ka la sdang bad ong, “Ka jingiaid jong ka kam ka long kaba iaid beit bad kaba i hun.”

U la pynpaw ruh ba kane ka project kam shym la iakynduh ia kano kano ka jingeh ha kaba iadei bad ki jaka puta lait noh tang ki jingkam bad ki jingiakam markylliang halor ka jinglong trai da kaba kular ba ia kum kine ki mat yn lah ban pynbeit da ki DC jong kine ki artylli ki District.

Halor ka jingkylli ba la wanrah da u Nongialam ka Liang Pyrshah la ki don ne em ki longiing ki bym don jaka kiba shah ktah ha kane ka project, u Bah Prestone u la ong, “Ha ka jingshisha ia kane ka mat kaba la mih haduh kane ka khyllipmat hi ka dei kaba la shimkhia bad pynbeit da ki ar DC. Ngi don hangne kum ka sorkar ban iarap ruh na ka bynta ki longiing kiba shah pynkynriah. Lada ka lynti iaid jong ka surok ka iaid lyngba na kiba kum kine ki jaka, ia kaba kum kata ka mat yn shimkhia da ka sorkar ban leh ia kaba donkam.”

U la pynshai shuh shuh ba haduh mynta ba kam shym la don satia kano kano ka jingpyndonkam bakla ia ka pisa ha kaba iadei bad kane ka project.

Shuh shuh u Bah Prestone u la ong ba kam pat shym la don satia kano kano ka jingujor ne jingkynnoh da ki trai jaka halor ka jingdon ka jingkhate 10 lane 20 % ka bai jaka. “Kam pat shym la don kano kano ka jingujor ba la ioh pdiang da ki DC,” u la bynrap.