Dei ban iaineh ka rukom pule kot ban jop haka jingim ong u khynnah skul ka North Liberty HSS

Syllad | The Rising MeghalayaJuly 31, 2021

U Luigi Dalian Pasweth, u khynnah skul jong ka North Liberty Higher Secondary School (NLHSS), Jowai uba wan haka kyrdan ba lai haka First Ten Positions haka result HSSLC Science Stream kaba la pynbna ka MBoSE ula ong “ban jop haka jingim pule puthi donkam ban iaineh haka rukom pule puthi.”

Ula phah iaka khubor sha ki para khynnah skul ba “kam don da kawei pat ka buit ban pule puthi, hynrei ka dei ban iaineh (consistency) haka rukom pule puthi bad don ka jingkut jingmut ban pule puthi.”

U Luigi Dalian Pasweth, u dei u khun jong U Ma Agate Carnelian Chullai bad ka Kong Mardaka Pasweth na Panaliar, Jowai.

Shuh shuh u Luigi ula ong ba u angnud ban pule doktor bad u dang pynkhreh ban iakhun iaka National Eligibility cum Entrance Test (NEET).

Haba kylli la shah hikai halor ka jingpynkhreh NEET, ula ong ba ym shym la leit shah hikai, hynrei ula ioh iaka jinghikai na skul nalor ka jingpynkhreh jong u nalade shimet.

Haba iakren bad u principal ka North Liberty HSS, u Ma B Richard Uriah, ula ong ba kane ka jia long dei na ka jingdon ryngkat U Blei nongbuh nongthaw ba wat hapdeng ka jingtynjuh kaba ki iakynduh na ka jingwan lynsher ka khlam, hynrei ki nonghikai kila pynlut iaki buit ki bor ban sam jingnang jingstad sha ki khynnah online (lane da kaba pyndonkam iaka kor internet) ba kin khur ia kane ka jingjop.

“Ngim don ki nonghikai kiba tbit, hynrei ki trei shitom katkum ka jingdawa ka por bad ka jingdon jingem ka skul ban sam iaka jingnang jingstad sha ki khynnah,” la ong Ma Richard.

U Luigi Dalian Pasweth, u dei tang ma na rilum Jaintia uba wan kane ka kyrdan bad kane ka dei burom kaba ula wanrah iaka iing ka sem kumjuh iaka skul baroh kawei bad ka district.