Dawa u Dr Mukul na ka CRB ban pynlong biang da kawei ka eksam thungkam Pulit

Syllad | The Rising MeghalayaJune 6, 2025

U Nongialam ka Liang Pyrshah uba dei ruh u Myntri Rangbah barim, u Dr Mukul Sangma haka 5 tarik Jylliew u la dawa ban pynlong biang da kawei pat ka writtern exam na ka bynta ki kam bapher bapher ha ka tnad Pulit ka Jylla hadien ka jingkynnoh ba ka Central Recruitment Board (CRB) kam shym la lah ban pyniaid katkum ki kyndon ban pynthikna ia ka jingleh hok ha kane ka jingpynrung kam baroh kawei.

“Ngan sa thoh sha u Chairman ka CRB Meghalaya Police halor kane ka phang ban pynthikna ba dei ban pynlong biang da kawei pat ka written exam na ka bynta kane ka jingpynrung kam pulit ha ki kyrdan bapher bapher,” ong u Dr Mukul haba kren sha ki lad pathai khubor.

Kane ka jingdawa ka jong u ka la wan long hadien ba ka CRB ha ka 3 tarik Jylliew ka la pyllait ia u kyrwoh kaba kyrpad ia ki nongiakhun kam ba kin phah ia ki aplikeshon, ki jingujor, jingmudui ne kino kino ki bynta kiba iadei bad ka written test kaba dang shu dep ha lane shwa ka 6 tarik Jylliew 2025, ia kaba ha ka jingsngew jong u ka long markhongpong ia ka jingpynbna ba la pynmih ha ka 6 tarik Lber 2024 kaba la kdew shai ha ka para 18-kaba ong “Ki nongiakhun kam ki lah ban shah kyntait ha kano kano ka bynta jong ka jingpynrung kam namar ka jingbym iaid katkum ka rukom treikam ba la buh/ bym ai pura ia ki jingtip/ jingtip ba bakla/ jingbym pynbiang pura ia ki syrnot/ka jingpynpaw bakla ia ki jingshisha bad kiwei kiwei bad dei ban leh eiei katkum ka ain ha kum kine ki jait kam”.

Ka CRB ha u kyrwoh ka la ong, “Namar ba ia ka written test la lah ban pyndep, ka ophis ka CRB ka don ia ka jingthmu ban bishar bniah ia ki answer script bad OMR sheet jong baroh ki khyndai tylli ki centre thoh eksam da ka jingthmu ban pynkloi ia ka kam khnang ban lah ban pynbna kham kloi ia ka result. Hynrei, namar ka jingiai wan ki jingkyrpad ban pynbeit ia ki aplikeshon ba la pyndap bakla ia ki roll nombor, series bad kiwei kiwei, kumta ki kam ki la suki noh.”

“Mano ba khot ia kine ki aplikeshon? Hato ka don kano kano ka kyndon ia ki nongiakhun ban ai ia kino kino ki jingthoh ha kaba iadei bad kane ka bynta? Hato ka Recruitment Policy ka shah ia kane” buh jingkylli u Dr Mukul.

“Ngam pat ju ioh ia kaba kum kane ka jingthungkam kaba la pynthohbria da kum kine ki jingtuklar. Ka dei ka jingtuklar ha baroh ka jingpynrung kam baroh kawei. Mano ba la ai ia kane ka hukum sha u Chairman ka CRB lane hato ka dei ka rai shimet jong ka? Hangto la kdew ha ka notice ba ki kyrton ki bym shym la ai ia ki roll nombor kiba dei lane kiwei kiwei ki lah ban ai da ka jingthoh na ka bynta ka jingpynbeit,” u la buh jingkylli.

Nalor kata u Myntri Rangbah barim u la kynnoh ba ka sorkar ka la pynmih ia kum kine ki rukom jingjia ha ka jingtreikam khnang ban ioh thungkam ia ki briew kiba don jingiadei bad kiba ki don mon ha kane ka jingthungkam baroh kawei da kaba ong ruh, “Kane ka jingjia ka la pynmih ia ki jingkynthoh bapher bapher lyngba ki rynsan social media.

“Nga la pule ia baroh ki jingkynthoh kiba mih lyngba une u kyrwoh ba la pynmih da ka CRB ha kaba ki la mih ki jingkynnoh ba ha ki katto katne na kine ki jingthungkam ki don ki briew kiba ap eksam kiba la iarap ia ki nongiakhun kam kiba thoh ia ki eksam jong ki..” u la ong da kaba dawa na ki bor ba dei khmih ban shimkhia ia kiba kum kine ki jingkynnoh.