Dawa tuklar ka HITO ia u Myntri ban pyntreikam ia ka EDA ki home guard ha MeECL

Syllad | The Rising MeghalayaJuly 23, 2025

Ka Hynniewtrep Integrated Territorial Organization (HITO) haka sngi ba Ar ka la leit iakynduh ia u Myntri ka Tnad Bording u AT Mondal ban phah tuklar lem ha kaba iadei bad ka jingbym pyntreikam ia ka Enhanced Duty Allowance (EDA) da ka Meghalaya Energy Corporation Limited (MeECL) na ka bynta ki volunteer Home Guard.

Ka HITO ka la ong ba ka MeECL ka la pulom ban kohnguh ia ka jingbthah jong ka Sorkar lyngba ka Tnad Civil Defence and Home Guard ha kaba iadei bad ka jingsiew ia ka EDA sha ki volunteer Home Guard kiba la ioh jinghikai ia kiba la pyndonkam da ka MeECL.

“Kine ki voluntter ki la pyndep ia ki kam ki jam ia kiba ju trei mynshwa da ki nongap pahara ka MeECL, kata hadien ka jingbym lah shuh jong ka Corporation ban thung ia ki dkhot kiba thymmai mynta lah palat 40 snem,” ong ka HITO.

 Ki Home Guard volunteer ki dei kiba don ia ka jingkitkhlieh ha ka ban peit ban khmih ia ki jingpyntrei bad ki jingdon jingem ba kongsan jong ka MeECL kynthup ia ki power station, substation, store, ophis, ki jaka lum khajna, ki jaka pahara bad ki khyrdop. Watla ki la shim ia ki bynta kiba kongsan, hynrei kim shym la ioh satia ia ka bainong ba la pynkiew katkum ka hukum ba la pynmih da ka sorkar.

Kumta na ka liang ka HITO ka la kyntu ia u Myntri ka Tnad Bording ba un tuklar lem ia kane ka kam khnang ban pynthikna ba ka MeECL kan pyntreikam ia ki jingbthah jong ka sorkar ha kaba iadei bad ka jingsiew ia ka EDA sha ki Home Guard volunteer.

“Ngi kyntu ia phi ba phin bthah mardor ia ka MeECL ba kan kohnguh ia ki jingbthah lane jingpynbna ba la pynmih da ka Tnad,” ong u president ka HITO u bah Donbok Dkhar ha ka memorandum ba la aiti sha u Myntri.

“Nalor kata ngi kyrpad ia ka Tnad jong phi ban shim ia ka sienjam ban pyntreikam ia ka hukum ba la pynmih da ka Tnad Personnel/Meghalaya State Electricity Regulatory Commission na ka bynta ban pyndap ia baroh ki kam kiba thylli ba la mynjur man la ka por,” u la bynrap.